致富智庫：10大驚奇韋恩　10大人生貼士

東網電視

投資名宿韋恩(Byron Wien)自1986年起，每年年頭都會發表「10大驚奇」，內容涵蓋後市、經濟、政治，無論之前嗰年命中率係點，「10大驚奇」一出，金融界都會追住拜讀，地位有如股神巴菲特致股東信咁，唔睇過邊敢話自己係金融人。

佢老人家今年83歲，連PayPal創辦人蒂爾(Peter Thiel)與facebook營運總監桑德伯格(Sheryl Sandberg)都係佢Fans。財經雜誌《巴隆氏》最近刊出韋恩10個人生貼士，係佢行走華爾街超過50年得出嘅人生智慧，依家唔使5分鐘數晒你知，唔係唔睇啩。

=========

1、廣結人脈

「識人好過識字」係真嘅，韋恩都話「識人」好重要。人生好講運氣，不過佢話世間上，冇咩嘢比盡量識多啲人，更能催運。

2、善待新知

講到第二樣，都係人際關係。韋恩話，逢親新識人都要以朋友相待，視對方為幫助你人生嘅贏家。

3、時時閱讀

除咗時時讀，韋恩仲話，睇書或睇文前要先有自己觀點，之後再睇吓自己嘅諗法，到底得到作者引證定反駁。

4、充分睡眠

60歲之前要每日瞓7個鐘，60至70歲要瞓8個鐘，70歲後要瞓夠9個鐘。條數計埋晏覺，即是夜晚瞓8個鐘，晏覺1個鐘，加埋算一日瞓9個鐘。(韋恩佢老人家，83歲依然個腦唔停仲呢到去嗰度去，4月先去完亞洲，依家已經計劃下個月去歐洲，9月去中東，精力充沛到呢。佢講養生，梗要聽)

5、遊遍天下

趁「機器壞」之前走遍天涯海角，途中盡量識多啲有趣嘅當地人，兼成世同佢哋保持聯絡。

6、替人消災

講到慈善，韋恩話自己做法係，寧可盡量幫人減輕痛苦好過派糖。

7、唔走捷徑

韋恩深信，難行嘅路永遠係啱嘅路，千祈唔好走捷徑，捷徑代表馬虎，會摧毁你嘅事業。

8、與別不同

競爭時，唔好一日到黑諗住要點樣叻過人哋，事關始終會再有人叻過自己，之但係未必有人比自己更有想像力，所以「與別不同」更重要。

9、享受工作

啱啱出嚟做嘢又好，轉工又好，一定要搵份啱心水、最能夠享受嘅工。人工高嘅，你好彩，唔係嘅話亦要欣然接受。

10、永不言休

韋恩認為，做嘢愈耐，愈長命。

─ ─ ─ ─ ─ ─ ─ ─ ─

想領悟更多理財智慧，富足一世？即刻click入「致富智庫」

「東網Money18」fb專頁：有討論、有分析，齊來FUN享，贏盡●你Like

on.cc東網