想打入小學名校？家長們︰租樓攻略Ready！
20160603
東網電視
更多新聞短片
今年小一統一派位喺周六揭盅，塵埃即將落定之際，其實另一班家長已經開始要「接力」，為2017年入讀小一嘅仔女籌謀。仔女就升小一嘅年輕家長唔多了解唔緊要，慢慢睇點樣用最經濟嘅方法博入名校，趁暑假就來臨鋪定路喇！
每年學校考試一完，暑假臨近，就有一批家長們忙於搵樓報學校；希望自己仔女赢在起跑線。其實喺香港地，只要善用現行小學「就近入學」政策，就算唔係上等人，仔女一樣有機會做名校生，仲要未來6年免學費嗰隻，唔使「風之后」所講儲400萬，都可幫仔女踏上青雲路。
有冇聽過11、12、34同41呢啲數字呢？唔係估下期六合彩有乜中獎Number，係指全港4個最Top嘅名校網，入面雲集咗好多星級官津名校，喇沙、聖心、協恩、華仁...單聽個名已粒粒皆星，只要利用現行「就近入學」政策，喺心儀名校嘅校網內居住，喺第2階段俗稱「大抽獎」嘅「統一派位」就會發揮優勢，雖然唔係寫包單一定入到名校，但至少唔會好似第1階段「自行分配學位」咁，計完一大輪分後即刻成個人灰晒。
星級名校年年爭崩頭，有人為咗仔女爭一學位，豪擲幾千萬買層豪宅都在所不計。不過，博入名校未必一定鬥燒銀紙，唔想買樓，租樓一樣有計，事關呢4個名校網覆蓋嘅範圍不乏平民地區，最平月租萬幾元就有個小天地。睇睇以下由地產代理提供嘅名校網平價租盤入手資料，最貼市情報一目了然，仲要有埋租盤同學校位置分布圖畀大家參考，唔睇真係閣下損失。
─ ─ ─ ─ ─ ─ ─
●校網11
先講港島區嘅校網11，涵蓋中上環、西半山、西營盤、石塘咀、堅尼地城等，女仔首選西半山堅道的嘉諾撒聖心學校、柏道的聖士提反女子中學附屬小學；男女校的般咸道官立小學、上環兩間英皇書院同學會小學、高街的李陞小學同埋石塘咀的聖公會聖彼得上下午小學等等，都係區內備受家長推崇的地區名校。
呢個校網最平租盤就要放眼西環尾舊樓堅尼地大廈，租金同大廈名相反，一啲都唔「堅離地」，1.2萬就可租個442呎2房單位，不過係唔係太舊就要自己衡量。其實，住上西半山Budget都係多幾千，入場盤萬城閣租價1.68萬元有交易。
─ ─ ─ ─ ─ ─ ─
●校網12
同樣喺港島嘅校網12，範圍分布灣仔、銅鑼灣、跑馬地、大坑及東半山一帶，家長經常搞錯嘅係天后一帶物業，並非一定屬於呢個校網以內，租樓真係要留意。男女校熱選梗係兩間軒尼詩道官立小學，而家轉咗全日制，一間留喺原校，一間去咗東院道，同名牌官中皇仁書院及庇理羅士女子中學有聯繫關係。男校不妨放眼司徒拔道嘅津小番禺會所華仁小學同活道嘅聖若瑟小學，直屬中學盛產狀元及傑出學生。
校網12內，平租盤分布灣仔及銅鑼灣一帶，修頓球場對面嘅熙華大廈2房戶叫租1.3萬元；銅鑼灣嗰邊就貴些少，入門盤係糖街樂聲大廈，2房單位叫租1.5萬元。兩個租盤雖則樓齡唔輕，但勝在位處鬧市核心內圍，日常生活至方便。
─ ─ ─ ─ ─ ─ ─
●校網41
想博入九龍區頂尖名校，一定要提校網41，頂尖名校多不勝數，男校首選喇沙利道的喇沙小學，唔使多講係名牌中嘅名牌；女校則有窩打老道的瑪利諾修院學校（小學部），剩睇校舍似足Harry Potter電影裡面嘅英式魔法學校，貴族味十足。男女校則有「舊小拔」之稱嘅拔萃小學、華德學校同九龍塘官立小學。不過，要留意近年呢個校網學額嚴重短缺，須向黃大仙區「外借」學額，令派往鄰區校網學校的風險增加。
校網內平價租盤向來喺九龍城入手，但係盤源1個起2個止，依家最平係坐落太子道東嘅45年樓齡舊樓啟德道34號，2房月租叫1.18萬元，係就係較親民，但無升降機搭，日日行上行落都幾頭痕。至於九龍塘入門就要瞄準廣播道舊式屋苑百美花園，2房戶入場租價1.7萬元，屬同區最平之選。
─ ─ ─ ─ ─ ─ ─
●校網34
最後講嘅校網34，範圍主要分布何文田、土瓜灣等，租價較平嘅土瓜灣都有唔少名校喺度，如中學部轉咗直資嘅協恩中學附屬小學，旁邊的農圃道官立小學，同埋福祥街嘅馬頭涌官立小學，都深受區內家長歡迎。何文田一帶名氣較大可揀常盛街的陳瑞祺（喇沙）小學。
土瓜灣一帶而家最平租為超過半世紀唐樓雲天大樓，2房戶租1.25萬元，如果嫌太舊，畀多2千可租新進屋苑啲傲雲峰2房戶，玩埋會所仲得。何文田內最平首選「富貴居屋」俊民苑，2房戶入場租價1.45萬元進駐豪宅區。
─ ─ ─ ─ ─ ─ ─
「致富智庫」領悟理財/職場智慧，一Click改變一世
「東網Money18」fb專頁：有討論、有分析，齊來FUN享，贏盡●你Like