一次過睇晒黃國英Talk Show精華！
20160611
東網電視
更多新聞短片
股壇名嘴、豐盛金融資產管理董事黃國英(Alex)今晚在伊館開《財力覺醒》投資Talk Show，究竟有乜精彩環節？Alex又有乜嘢獨到見解畀大家？即刻話畀你知！
你仲可以去埋東網Money18 Facebook專頁http://www.facebook.com/money18 睇早前嘅直播片段添。嗱，記得like我哋呀！
─ ─ ─ ─ ─ ─
●點樣先係「真‧股王」？
講開股，黃國英話個股要成為「真‧股王」，就要有能力穿越周期，憑藉公司卓越能力令到產品或服務供不應求，最經典嘅例子係Nike，波鞋泛濫，但Nike貼個Air Jordan牌上去就炒到飛天﹗咁到底點樣發掘「真‧股王」？Alex話基本主要分為3類。
首先，係擁有核心地段優質物業，領展(00823)、置富(00778)，港鐵(00066)都係好例子。第二，係強勢品牌，呢招係股神巴菲特嘅必殺技，最令人印象深刻嘅係可口可樂，強勢品牌要穿越周期，關鍵係要保持強勢，否則爆得仲大獲過啲超級周期股，故市場好謹慎，一方面主力追捧啲老品牌，仲要係基本消費品，例如可口可樂、麥當勞、金寶湯，而電影就淨係得番迪士尼；另一方面，就戰戰競競去追如Under Armour、Tesla這些新興勢力，博係Nike翻版，可以紅足幾十年﹗
最後一類係科網，佢話如今有別於2000年，巨型科網股如Google和Facebook已有一個好大嘅盈利和用戶基礎，推出新服務都毋須亂燒銀紙做推廣，省下的市場推廣開支可投進研發及收購有前途的新公司，盡收天下兵器和人才﹗
佢話，經過今次經濟低潮後，新創企業要籌錢會好難。但好似Facebook、Google、微軟、Amazon及蘋果公司，就依有能力每年投放幾十億美金做研發。如果投資者相信人工智能、虛擬實境、無人機等等新發展有前途，幾年之後肯定又係呢批公司惡晒，長買呢批巨型科網股唔會有錯咁話﹗
─ ─ ─ ─ ─ ─
●3大趨勢令人堅‧擔心
黃國英又話，最近觀察到3個令人擔心嘅發展，係「堅」驚嗰隻﹗到底係咩？
原來第一係「極簡主義」嘅冒起。佢話日本有位男雜誌編輯--佐佐木典士，住百零呎單位，以前成日想比人擁有更加多所以不停買嘢，但唔知點解忽然覺得好空虛，結果頹到連女友都甩拖，刺激下將屋企所有雜物扔掉，剩基本家具同日用品，連電視都冇，每日就用iPhone同Macbook接收訊息。但竟然此後心靈反覺滿足，並將經歷寫成書，台灣譯做「我決定簡單的生活」，提倡「極簡主義」，結果大受歡迎，成為傳媒紅人！
Alex話，其實呢位人兄依然有消費，出書發咗達後仲要買貴野，但買得太少，萬一呢位人兄成為「潮流教主」，個個學佢「極簡」生活，洗少啲就唔使咁辛苦賺錢，咁有幾多間公司可以發圍？想唔股災都唔得喎！
第2個趨勢係共享經濟嘅崛起，表表者係Uber同Airbnb，商業模式重點係善用社會入面嘅閒置資源，咁可以買少好多架車，起少好多間酒店。Alex笑言，若未來幾年共享模式被發揚光大，咩都透過Apps去Share，咁成個社會對物質嘅需求將會大跌，仲唔大大鑊！
第3個趨勢係藉網絡以弱戰強，代表係毛記電視嘅崛起。佢話喺呢個新時代，新公司想立足一定行精兵制，集中攻擊龍頭公司某一點去搵食，而龍頭公司無可避免會變得大而無當，到時愈賺愈少，只有控制成本，但新紮公司又規模太細唔請得幾多人，搞到個行頭愈嚟愈窄，對打工仔十分不利﹗結果勞工市場出「M型化」，得番荀工同埋基本工，中間愈嚟愈少，多咗人無嘢好撈，要去做基本職業，貧富差距進一步加劇，更又可能會加快極簡主義抬頭﹗
咁講法，未來股市死因可能係「極簡主義」、「共享經濟」加埋「網絡鋤強扶弱」三劍合璧，大家聽落係咪都覺得幾閉翳呢？
─ ─ ─ ─ ─ ─
●揀股：美國隊定香港隊？
講到全晚戲肉，當然係搵黃國英畀貼士啦，今年嘅貼士分香港隊同美國隊，因為今時今日做基金經理要打「世界波」。香港隊領展(00823)當「龍門」，「前鋒」係騰訊(00700)；中場就有瑞聲(02018)、中海物業(02669)、IMAX(01970)、舜宇光學(02382)和中航信(00696)；「後衛」就有首都機場(00694)、置富(00778)、港鐵(00066)及長建(01038)。
至於美國隊則有迪士尼、亞馬遜、Facebook、Costco、Activision Blizzard Inc、SPDR S&P 500 ETF、MarketAxess、Take-Two Interactive Software、Align Technology、Kraft Heinz及McCormick & co.。
─ ─ ─ ─ ─ ─ ─
「致富智庫」領悟理財/職場智慧，一Click改變一世
「東網Money18」fb專頁：有討論、有分析，齊來FUN享，贏盡●你Like