新聞小花黃麗幗密密練功 接棒做新輪后

20160616
東網電視
更多新聞短片

轉戰金融業,在香港可說是家常便飯;但對於曾成為眾人焦點及話題的女主播,從鏡頭前人人稱羨的工作轉行,或許需要一份堅持和決心。在電視廣播(00511)鏡頭前為人熟識的前女主播黃麗幗(Ruby)上月離開任職4年的崗位,轉至海通國際(00665)擔任股票及衍生產品銷售助理副總裁,曾任財經記者的她,明言轉行做「窩輪」是深思熟慮的決定。

主播離職後的去向經常成為媒體的焦點,甚至會有流言蜚語,或與前東家不和,或與前同事交惡等等。Ruby對此卻不以為然:「大眾好似都好focus係主播呢個職業,愈來愈關注主播去邊度,甚至會有評論新工作嘅專業性,但其實好多人去到唔同嘅人生階段,諗法、際遇都唔同,選擇轉行去適應新環境學新嘢,係好正常嘅事。」

不少知名前主播,如林燕玲、趙海珠等,離開TVB後同樣成為「輪后」,Ruby在其他人眼內,像走她們的舊路,但她本人並不認同:「我大學畢業之後做財經記者,已經培養出財經方面嘅興趣,做咗主播之後,更加知道自己想喺金融業方面發展。」

「即使之前喺TVB,都有諗過轉到財經,適逢當時公司諗住搞財經台,不過諗落已經係電視台做咗幾年,又啱啱讀完書,想試吓接受挑戰,咁啱海通國際搵我,覺得佢哋係一間有發展潛力嘅中資公司,終於一拍即合。」

貿然轉行,每樣都是新事物,每樣都是挑戰。「以前一開電視就係睇晒所有新聞,唔會去深入了解太多,現時返工前起碼所有財經新聞都要知,大市走勢、尋晚美股走勢,甚至連油價、金價都要知。」

「之前TVB學到嘅嘢,包括應變能力、溝通技巧等,嚟到新公司都有好大幫助,況且以前做過新聞,同依家份工都唔會無關係。坦白講,主播轉行最初係有一定優勢,因為會比較多人識,覺得會有一個專業形象,但其實做耐咗,時間會證明一切,任何嘢都會見真章。」

海通國際今年初才推出窩輪業務,至今發行的窩輪約60隻,與剛轉行的Ruby一樣,都是公司的「新事物」。她表示,之後需要協助公司推出窩輪產品,舉辦投資講座及教育平台。

「雖然返新工唔夠1個月,但暫時嚟到都係學習階段,都唔覺得唔慣。」現時Ruby最希望可盡快考取業務相關牌照,全面投入工作,成功轉型做新的「輪后」。

─ ─ ─ ─ ─ ─ ─
「致富智庫」領悟理財/職場智慧,一Click改變一世
http://money18.on.cc/wealth

「東網Money18」fb專頁:有討論、有分析,齊來FUN享,贏盡●你Like
http://www.facebook.com/money18