睇樓逐呎度：昌運中心眼鏡房「五門歸心」
20160618
東網電視
更多新聞短片
80、90年代超小型單位常見嘅眼鏡房設計，絕對可以話係經典嘅實用則王，慳咗走廊及玄關位，用盡室內每一吋地方。不過，針無兩頭利，呢種間隔同時衍生出「五門歸心」格局，個大廳想擺傢俬都幾考功夫。好似今次逐呎度嘅大埔昌運中心單位，無論係2個房門、浴室門、廚房門同埋大門都係對住嗰廳，擺放家具認真頭痕，電視櫃同梳化都唔知點處置先最好。
今次同大家一齊睇樓逐呎度嘅大埔昌運中心兩房戶，實用面積約339方呎，係傳統嘅「眼鏡房」布局，全屋冇玄關兼走廊位，設計工整，實用指數非常高。客飯廳有逾130方呎，最長約13.94呎，配合高約8.84呎樓底，空間尚算夠用。
單位最抵讚嘅地方，當然係「眼鏡房」設計，省卻玄關及走廊，兩間睡房分別約60方呎及逾50方呎，四正實用，主人房有兩邊窗，營造通爽效果。
不過，同時間最大問題亦都「眼鏡房」開則，會出現「五門歸心」嘅布局，即係話5個門口位對住客廳，想搵幅夠大嘅牆去擺貼牆大型傢俬都好難，連電視同梳化又要諗吓計，兩者擺得太近，住起嚟都覺唔四正。
大埔市中心一帶，聚集多個細價屋苑，唔少有行人天橋接駁，消閒方便，深得用家歡迎。坐落其中嘅昌運中心，地理位置不比大埔中心遜色，但規模就細得多，僅得4座物業，提供800伙，全為2房開則，適合平實用家選擇。單位一般實用面積近300餘方呎，通常不設玄關位，部分兩房為呂字廳間隔，設計分明。
美聯區域經理汪子龍表示，昌運中心上月只錄1宗銀主盤成交，市場現有不足20個買賣放盤，近期業主叫價由年初時反彈，回升至360萬元水平。
─ ─ ─ ─ ─ ─ ─
「致富智庫」領悟理財/職場智慧，一Click改變一世
「東網Money18」fb專頁：有討論、有分析，齊來FUN享，贏盡●你Like