睇樓逐呎度：形品‧星寓姚明都住得落
20160709
東網電視
更多新聞短片
男人生得高大唔係罪，怪就怪香港啲住宅樓宇，大部分樓底唔夠高，吓吓企起身頂到天花板撞親嗰頭，認真無癮。今期「睇樓逐呎度」參觀大角咀單幢物業形品‧星寓單位，最大賣點正係樓底超過10呎，連身高7呎6吋嘅「移動長城」 姚明入屋都唔會頂頭，伸吓懶腰都唔使就住就住，解決晒「高人一族」嘅煩惱，係唔係覺得好正先？
今次同大家逐呎度嘅係形品‧星寓嘅原則開放式單位，實用面積僅得296方呎，空間狹小，但勝在實用率高近八成，喺單幢迷你戶嚟講相當唔錯。單位有小玄關，客飯廳佔地近130方呎，加上備有露台，活動空間充足。
不過，單位最煞食嘅地方，絕對係超過10呎高嘅樓底，真係姚明入到屋都唔使尷尬，至啱「高人一族」住啦！
單位原本圖則不設睡房，但業主巧妙咁將廚房改為睡房，面積約47方呎，地方算闊落，兼且業主利用窗台位置用貼床，床下做地台收納衣物，慳位實用。至於廚房則融入大廳之中，變為開放式廚房，物盡其用，唯一需要留意嘅，就係要慎防煮食時空氣唔夠流通。
大角咀近年有唔少時尚新簇嘅單幢物業落成，為這舊區注入新氣息。入伙約5年嘅形品‧星寓，坐落洋松街，係市區重建局近年興建嘅新式單幢住宅之一，外形時尚新穎，喺舊樓群中甚為顯眼。
該處靜中帶旺，出入九龍各區方便，物業雖僅得377伙，惟間隔多元，主攻中小型單位，以開放式及一房戶型佔多，另設有基本嘅住客會所。
香港置業營業經理鄺偉源表示，形品‧星寓二手成交穩定，6月份錄到兩宗一房戶成交，成交價分別為480萬元及495萬元。上述介紹嘅開放式戶型，現只有一個低層戶放盤，叫價448萬元放售，低於市價。
-----------
「致富智庫」，領悟理財/職場智慧，一Click改變一世
「東網Money18」fb專頁：有討論、有分析，齊來FUN享，贏盡●你Like