揸收息5寶坐鎮 實食冇黐牙？
20160710
東網電視
更多新聞短片
近排睇報紙講「避險」，落魚缸班股友又講「避險」，去同班姊妹Afternoon Tea都仲係講「避險」，唔知嘅仲以為第3次世界大戰！英國脫歐嘅夢魘令各國投資者人心惶惶，趕住將資金泊入「防空洞」，歐洲國債跌入負利率區間，令資金追逐美債，搞到長短國債孳息一度齊齊破底，究竟依家仲有冇唔使食驚風散、印印腳就有息收嘅出路？彩兒同Kitty都要問吓專業投資者Starman(S)同恒生銀行投資產品及顧問業務主管李佩珊(李)有咩好介紹，睇吓有乜筍貨買！
───────────────
●REITs回報穩 好過買樓收租
風險指數：＊＊＊
(風險指數以5粒＊為最高)
●彩兒：你近3個月以嚟利用收息工具賺咗過百萬回報，REITs幫你唔少？
●S：個人比較鍾意REITs，好似領展(00823)咁，隨街喺商場、舖都可以睇到佢嘅業務係點，肉眼睇到，貼近少少。另外，置富產業信託(00778)、越秀房託(00405)等大眾容易接觸到公司資訊嘅REITs都係我首選。因為房託基金相比起自己買樓、買舖收租方便，門檻低好多，每年回報率亦有一定保證，再者，因應市場資金近月買債避險，推高債價，所以我已沽出部分債券，轉投REITs懷抱。
以現時市價而言，唔少REITs年收益率可達6至8%，係唔錯嘅選擇，主因買物業收租要交稅、又要搵租客，需要物業投資知識。不過，房託基金有規模經濟(Economies of Scale)，持有一籃子的商舖或商廈，亦有資金去優化，REITs的負債比率雖然會低於40%，佢自己已經會做融資，其實已包含槓桿；加上我喺私人銀行或部分機構做投資，亦有提供低息(不高於2厘)按倉服務，故起到雙重槓桿嘅效果，喺呢個情況下，每年回報有10幾厘唔係難事，亦具防守性。
●Kitty：投資REITs都有承受波幅，好似隻越秀房託喺2011年就跌咗2成，但拉長就幾好賺，過去3年，累積總收益逾3成，領匯期內總回報仲超過5成添。但係香港嘅REITs我哋都見慣晒啦，有冇啲私伙好嘢分享吓？
●S：持有九龍塘又一城嘅新加坡REITs豐樹大中華商業信託(新交所：RW0U)，有7至8厘股息率，都係我嘅投資之一，又一城嘅租約一般只係2、3年期，但勝在租戶穩定，租金回報增長唔錯，所以喺市況唔明朗，睇唔透嘅情況下都係好選擇。雖然佢喺新加坡上市，主要資產係位於香港，呢隻REITs一般香港證券行都可以買得到，尚算方便，但要留意，需要將資金兌換成新加坡幣先入到市喇。
───────────────
●揸企業債 進可攻退可守
風險指數：＊＊＊
●Kitty：債券門檻高，唔係個個玩得起，聽聞你都係債主。
●S：債券普遍需要20萬美元(約156萬港元)入場費，證券行先受你玩，買企債好處係債價升，你可以資本增值，如果持有至到期，亦可賺息，拎番本金。
個人比較鍾意2至3年期、較短年期嘅債券，因即使係一啲較大嘅企業債券，都會有5至6厘年回報，若買入後將佢抵押番畀銀行，套現再買債券，喺槓桿方式投資下，年回報可達8至10厘。不過，要留意，由於近期債價升咗唔少，所以債息已相應下滑。
我唔建議買長年期債券、永續債或CoCo Bonds(應急可換股債)，因應前兩者長年期，後者唔保本，多數每半年派1次息，長期睇，若未來幾年面對加息，或有較好收息產品，債價或波動，若有做槓桿，會有補倉風險。
●彩兒：有啲企債成十幾厘息，愈高息愈好？揀乜行業好？
●S：行業視乎唔同投資者需要，高息債券主要集中喺內房債，但恒大(03333)負債高企，我傾向避開，反而其他資產狀況好啲嘅，碧桂園(02007)、雅居樂(03383)同世茂房地產(00813)值得考慮，6至7厘債息尚算合理，有8至10厘息嘅債券，就要留意公司面對嘅風險。
內房企債券前景始終受制於內地房地產市場，若想配合槓桿式投資，就要預留資金應付突發性補倉嘅需要，如資金鏈斷裂，費事最終被強制斬倉。
●S：評級較高嘅企債，如長和(00001)發行嘅債券雖債息較低，如想配合槓桿式投資，揀呢類違約風險較低嘅企債，個心會定啲。
───────────────
●債券及高息股基金分散風險
風險指數：＊＊
●彩兒：我有朋友想買高息股同債券，花多眼亂唔知點揀好，但又話自己窮到燶喎。
●李：佢可以考慮定期派息嘅基金，包括高息股基金同債券基金，呢類基金投資一籃子債券或高息股，可以起到分散風險嘅作用。投資債券基金同直接持有債券嘅最大分別係，你未必清楚知道基金持有債券嘅發債機構，同埋債券到期日細節，亦冇保本嘅概念，不過，喺市況不明朗下，都係一個好選擇，我睇到投資基金公會報告話，睇番5月份，有約74%基金銷售額係買入高息股或債券基金，所以近期真係好Hit。
●Kitty：我知道落銀行可以認購，但記得錫住我個荷包呀。
●李：其實應該落銀行做番個評估，睇吓基金風險評級切唔切合個人風險承受能力，亦要留意基金月報所講嘅投資策略，過往基金表現，投資信貸評級分布等。
李：銀行一般基金入場門檻係2萬港元(下同)，認購費係1.5至2%；我哋銀行亦提供網上基金戶口服務，入場門檻低至3,000元，仲係唔夠錢嘅話，大可以揀月供基金，最低月供1,000元。
───────────────
●公用股高息 中電3厘和味
風險指數：＊＊
●Kitty：坐定粒六穩袋高息係唔少姊妹嘅夢想，但現實邊有咁理想？
●彩兒：做到恒指成分股嘅，都唔係冇風險，如高息股滙控(00005)有逾8厘股息率，但佢最受制於英國脫歐事件發酵，股價未來有機會繼續玩過山車，都唔知會唔會賺息蝕價，一場空！
●Kitty：咁不如追求啲「生活淡淡似是流水」，派息時先「泛起漣漪」嘅股份？好似隻中電(00002)咁，今年上半年升逾21%，冠絕一眾指數成分股，仲有逾3厘股息率，買咗真係財息兼收。
───────────────
●銀色債券包有2厘 勝存銀行
風險指數：＊
●彩兒：做咗咁耐冇腳嘅雀仔，我都有啲厭，有啲想停落嚟，每日短炒嘅生活都捱唔到好多年！
●Kitty：第一批由政府推出嘅銀色債券(Silver Bond)應該今個月底會接受認購，市傳同iBond認購方式差唔多，可經21間配售銀行認購，亦係與通脹掛鈎，以市場預期香港通脹有2%多啲，好過放喺銀行好多，最正係有2厘包底，但就冇2手市場，只可原價賣番畀政府，幾啱你喎！
●彩兒：你係咪想死啊？銀色債券係畀65歲以上人士申請咋！
─ ─ ─ ─ ─ ─ ─
其他精彩新聞：內地6月CPI同比升1.9% PPI降2.6%
「致富智庫」領悟理財/職場智慧，一Click改變一世