股評人話當年　同DSE同學打打氣！

3位大家都唔會陌生嘅股評人，一直喺金融界贏到不少掌聲，未知佢哋當年又點面對公開試嘅壓力呢？訊匯證券行政總裁沈振盈（沈大師）、豐盛金融資產管理董事黃國英、君陽證券行政總裁鄧聲興就趁住今日DSE放榜，分享考試心得，為各位同學仔打打氣！

最近流行講「贏在起跑線」，沈大師就斬釘截鐵話唔信呢句嘢！話自己唔係名校出身，會考(HKCEE)成績都係不過不失，而中學嗰陣更係「怕醜仔」一名，好怕講嘢！入咗大學之後，佢就自動請纓做司儀，訓練口才同膽識，依家先可以淡定上鏡分析大市。佢又鼓勵考生，最重要係知道自己弱點，再加以磨練；當有機會同運氣嚟嘅時候，就可以成為「大師級」人馬！

當年會考成績唔錯嘅黃國英就話，公開試成績雖然有助將來成為專業人士，不過喺依家新嘅經濟環境之下，大家都多咗唔同嘅發展機會，只要好好利用天賦才能，照樣可以出人頭地。

而鄧聲興就話，當年會考最好都係得C，大部分都係拎D。不過佢承認，日後出嚟做嘢嘅方向，可以同自己學科完全唔同，所以同學仔唔需要太介懷成績好壞，只要認清目標努力進發，前途依然係一片光明！

─ ─ ─ ─ ─ ─ ─

「致富智庫」領悟理財/職場智慧，一Click改變一世

http://money18.on.cc/wealth

「東網Money18」fb專頁：有討論、有分析，齊來FUN享，贏盡●你Like