我要做財演:學做財演至緊要Talk得

20161002
東網電視
更多新聞短片
黃德几(右一)左起Addi、Stephen、Mishell及Sarah。(陳德賢攝)

要在金融界闖出頭,做個讓人印象難忘的財演,除了要有端莊的外表,談吐舉止也絕不容忽視。今集《我要做財演》,請來曾經擔任電台及電視節目主持的金利豐證券研究部執行董事黃德几(Dickie),跟4位商科大學生輕鬆分享說話技巧兼講股經,避免畀股友們問到「口窒窒」!

Dickie為全球高智商人士組織Mensa香港分會會員,學生Stephen先問:「有無試過個腦轉得快,個嘴跟唔切?」Dickie笑言,「我好大言不慚咁講,其實我表達能力都幾強。」好!今趟就直接考考呢位「股壇金句王」的股經。

1.大學生應唔應該炒股?
攞自己錢炒就得,借錢投機炒賣,絕對唔可以。喺唔影響學業、拍拖、玩樂、交朋結友的情況下,小試牛刀並無不可。

2.有冇可能靠炒股賺到層樓首期?
賺錢方程式係量入為出、努力儲蓄,透過股票資本增值賺首期。

3.騰訊控股(00700)仲買唔買得過?
騰訊200蚊樓下仲買得過,佢有好嘅盈利能力,一旦10月股市回吐,便可趁機吸納。

4.有邊隻股表現拍得住騰訊?
無,未見有10幾年升幾百倍兼優質嘅股票,未來潛力股繼續係新經濟行業股,涵蓋互聯網、手機應用程式開發商及零售商等。

5.我阿爸70歲仲炒窩輪,係咪唔啱?
對!太高風險,容易輸引伸波幅、輸時間值,不如用平均成本法買入南方A50(02822)、盈富基金(02800),因其股份覆蓋廣,投資風險低,且多數跑贏通脹。

除了理財知識夠外,本身的說話技巧當然好重要。Dickie提到:「首先,兩文三語要好!」他建議同學找一個模仿對象,學習其演講技巧。他讚揚部分政客的談吐,例如美國總統奧巴馬,「幾時認真、幾時輕鬆,佢掌握得好好!」

至於出席財經節目回答投資者問題,他說,最基本要做到精準、淺白和易明。他亦含笑為股評人抱不平,「可能你會覺得,股評人成日講兩句基本面,背少少業績,或講吓走勢圖,就打發人走。其實背後嘅付出,又有幾多人會知?」

他續說,「時間所限,如果得30秒,又要答咁多觀眾問題,惟有講佢哋最關心嘅嘢先,隻股票升定跌;而唔係講中期業績毛利率有幾高,純利率有幾多。」

Dickie高低抑揚的語調,令同學們份外投入。「眼神要定,偶然望你、望佢,要令受眾感覺受重視。」

若在演講廳跟過千人說話,他說,單用眼神未夠,更要配合肢體語言。他示範了一些慣用的手勢及站立的姿態。「我會教夜校,所以要識點樣演說,先唔會令同學瞓著。」

最後他教同學們一個開聲方法,「試讀,一粒葡萄、兩粒葡萄、三粒葡萄,再換氣讀到三十,就應該OK。」

─ ─ ─ ─ ─ ─ ─ ─ ─ ─ ─ ─
「致富智庫」,領悟理財/職場智慧,一Click改變一世
http://money18.on.cc/wealth

「東網Money18」fb專頁:有討論、有分析,齊來FUN享,贏盡●你Like
https://www.facebook.com/money18