睇樓逐呎度：曉峯灣畔70呎大房好啱feel
20161009
東網電視
更多新聞短片
年輕人成日抱怨香港啲樓又細又貴，連女神游BB都爆Seed，講出咗唔少香港人嘅心聲。如果講中你的話，咁今期《睇樓逐呎度》介紹嘅馬鞍山曉峯灣畔2房單位，應該都符合到需要喇！呢款單位，主人睡房絕對係亮點，全間房面積超過70方呎，仲未計廿幾呎窗台，真係放張King Size床兩邊落地都仲得。睇完真係連游BB都應該會OK呀！
今次去現場度呎參觀嘅曉峯灣畔單位，實用面積約482方呎，雖然話屋苑前身係夾屋(夾心階層住屋計劃)，後來轉做私樓，但開則一啲都無馬虎，廳、房四四正正，加上樓底約8.46呎，絕無壓逼感，擺放家具亦容易。
一入到屋，經過小小嘅玄關就到廳堂，採長形設計，面積150方呎，空間感唔錯。雖然話廳長近18呎，但係客廳同飯廳唔係咁對稱，尤其客廳的牆身明顯較窄，擺部超闊螢幕電視最好度吓位，好在廳旁有落地玻璃窗，室內光猛舒服。
兩個房間位置歸邊，只要在走廊加裝小門，可分隔寢區及廳堂。主人房可以話係全屋亮點，面積超過70方呎，放張King Size床可以兩邊落床，不過7呎長嘅窗台位，實用性就冇咁好。至於另一個客房唔算大，面積僅約45方呎，不過單人床同衣櫃都仲放得落。
全屋最失色嘅地方都算係廚房，雖則長近9呎，地方尚算闊落，但係呈不規則設計，個三角位真係好難擺位，度身訂造廚櫃善用空間係常識吧。
世紀21奇豐程子健話，曉峯灣畔呢類2房戶現有7個放盤，入門盤為2座高層海景戶，叫價580萬元，屬呢一帶臨海屋苑入門2房之選。
屋苑由房協發展，5座大廈提供逾1,100伙，樓齡約16年，主攻2房及3房戶，部分單位享海景。雖前身為夾屋，但外形甚有私樓Feel，而且設有住客會所、室外泳池等康體設施齊全，居住環境一啲都唔失禮。
曉峯灣畔位於沃泰街，坐落臨海地段，前臨吐露港，環境清幽。交通方面亦唔輸蝕，離港鐵大水坑站約5分鐘步程，享鐵路優勢，加上錦泰商場近在咫尺，日常生活便利。
─ ─ ─ ─ ─ ─ ─ ─
香港樓市日日新鮮，話題多多，想睇晒最update樓市新聞短片，即刻click入 http://bit.ly/1M2kP95
樓市乍熱，想睇更多一、二手樓精彩故事，即click以下連結：
新盤置啱睇
二手置啱Feel