致富智庫：7個忠告阻你發達 聽從有後果
20161206
東網電視
更多新聞短片
炒股遇上「明燈」？攞錯股份「冧把」，最多係損手蝕啲錢，轉頭可以搵過。但若係信錯事業忠告行錯路，試問人生有幾多個10年可以掉頭？自己決定錯咗無得怨，信錯人就冇仇報。以下7個至靠害嘅事業忠告，好彩受害人冇聽足先有今日。以下7句，有冇人同你講過呢？
講明先：人生涉及風險，事業可升亦可跌，閣下不應只單獨基於本文而作出任何人生重大決定。
===========================================
1、「唔好炒股！」
受害人：股神巴菲特(Warren Buffet)
話說巴菲特未夠21歲當年，有兩個人叫佢唔好入行炒股。邊位差啲令股神「夭折」？一個係巴菲特阿爸，另一個係巴菲特師傅格雷姆(Benjamin Graham)，即係被稱為「價值之父」嘅經濟學家。巴菲特當時讀緊哥倫比亞商學院，格雷姆就係佢老師。點解叫佢唔好入行炒股？股神今時講番起，話可能佢哋覺得要成熟啲先好掂股票喎。不過好明顯巴菲特冇聽阿爸同師傅講，仲成為今時今日擁有超過650億美元(即逾5千億港元)身家嘅股神。
2、「想搵工搵生意，最緊要周圍派卡片！」
受害人：理財顧問Ramit Sethi
嚴格來講，Sethi唔算係受害人，只係見有人講呢啲，佢抵唔住頸出番句聲，話「搵工搵生意，最緊要周圍派卡片」呢句說話係大錯特錯。搵生意唔係靠張懶光光鮮鮮嘅卡片與名銜，而係靠人脈同能力，齋派片係冇用嘅。
3、「做你鍾意嘅嘢，啲錢會跟住嚟！」
受害人：職場顧問特倫克(Penelope Trunk)
全世界都叫人「做你鍾意做嘅嘢」，否則做人會好辛苦。不過Trunk話，呢句千祈咪信，事關鍾意嘅工其實好難搵，分分鐘一世都未必搵到，所以應該搵份你善長嘅工作，做起上自然會有滿足感，自然會有回報，唔好單單淨計較「鍾意」。
4、「已經有人做過啦！」
受害人：暢銷作家Malcolm Gladwell
Gladwell個名你未必記得，但佢出嘅書你未睇過都會聽過，包括《引爆趨勢》(The Tipping Point)、《決斷2秒間》(The Blink)、《異數》(Outliers: The Story of Success)、《大開眼界：葛拉威爾奇想》(What the Dog Saw)及《以小勝大》(David and Goliath)等，本本暢銷。但原來佢咗出道時，佢每次有諗頭，就會講畀一個朋友聽，點知佢朋友例牌一盤冷水照頭淋話「已經有人做過啦！」不過Gladwell就認為，同一個題材夠每日有一百個人寫過啦，睇你點寫法啫，團火先冇畀人淋熄。
5、「你一個人實搞唔掂！」
受害人：美國地產天后Barbara Corcoran
The Corcoran Group創辦人、喺ABC創業真人秀節目Shark Tank中任評判嘅Barbara Corcoran話，當年佢畀一齊夾份開The Corcoran-Simone Company嘅前男友侮辱，呢個男人同佢講「你冇咗我實唔掂！」多得個男人呢句，令Corcoran發奮成為地產天后。個男人依家？唔知呢。
6、「同一時間只做一件大事！」
受害人：暢銷作家Danielle LaPorte
暢銷勵志書作家Danielle LaPorte話，曾幾何時有人叫佢，話做大事應該一樣一樣嚟，同一時間只能做一樣嘢咁話。不過LaPorte話，冇錯，講到時間管理，佢亦好Buy要集中呢套，不過講到創意同個人整體發展，就唔可以逐樣嚟，事關逐樣嚟只會將心裏團火淋熄，只有個腦同時諗唔同嘅嘢，團火先Keep得住。
7、「遵從自己嘅熱情而行！」
受害人：NBA達拉斯小牛班主古班(Mark Cuban)
古班話，一味「遵從自己嘅熱情」係無用嘅，最重要嘅係「努力」先啱！佢話呢個世界未必搵到既有前途而你又好有熱情嘅事業，齋熱情唔可以當飯食，不如搵一瓣自己叻嘅，埋頭努力做，創一番事業。就係咁，古班依家除咗係美國職業籃球隊達拉斯小牛班主外，亦係美國知名企業家，身家33億美元(約257億港元)。
=======================================
未衰過又點知衰？除咗以上「7個至靠害嘅事業忠告」外，從錯誤中學習嘅，仲有以下呢啲：
●「3條大鱷投資最失敗的一次！」http://bit.ly/2ch43nC 。
●「4個敗家通病，財圈人中幾多樣？」http://bit.ly/2gfOsrG 。
●「搵工CV最忌寫呢10樣興趣」http://bit.ly/2gyLbRW 。
●「商務禮儀24禁忌」http://bit.ly/2gLadR9 。
●「投資成日損手的7個原因」http://bit.ly/2dhg66e 。
●剛返新工或初出茅廬，千祈咪犯呢「15條死罪」http://bit.ly/2gYeQow 。
─ ─ ─ ─ ─ ─ ─ ─ ─ ─ ─ ─
「東網Money18」全新功能「板塊追蹤」，助你分析抓緊投資先機
「致富智庫」領悟理財/職場智慧，一Click改變一世