巴菲特紀錄片月底美國播出 罕有談及家人
20170112
東網電視
更多新聞短片
巴菲特
美國電視台HBO將於本月30日播放股神巴菲特紀錄片《Becoming Warren Buffett》，有巴菲特親身受訪，仲有家庭錄影和照片等等。雖然巴菲特嘅生平故事好多文章以至自傳都已經敍述過，但今次紀錄片重點之一係講述較鮮為人知嘅家庭關係，特別係同首任太太以及父親之間嘅關係，股神粉絲要擔定櫈仔喇。
不過，巴菲特都唔係咩都肯講，例如懷念父親嘅時候，巴菲特雖然表現溫情，但就唔肯講兩人最後一次對話嘅詳情，只係提到佢作出投資生涯其中一次重大錯誤決定，就係1964年買入當時是一家紡織廠嘅巴郡，正是其父去世後數日嘅事。當然，巴郡依家已發展成瓣數多多嘅商業巨頭，但原本嘅紡織業務早就關門大吉了。
另一個惹人好奇嘅係巴菲特首任太太蘇珊，巴菲特講述咗許多有關蘇珊嘅故事，但對於蘇珊喺1977年離開佢，從奧馬哈遷至三藩市居住嘅決定就含糊其辭，話「冇咩好講」喎。其實，二人雖然分居，但一直到蘇珊2004年去世時都沒有離婚。至於巴菲特現任太太孟克斯就完全冇出鏡。
講到未來，已年屆86歲高齡嘅巴菲特話自己唔怕死，而且繼續熱愛工作，仲講笑咁話自己肉體上已貶值得七七八八，只剩下殘餘價值了，但見佢咁落力做慈善，就知佢仍然有心有力啦。
─ ─ ─ ─ ─ ─ ─
狂人入主白宮，睇通全球政經變化，即上專頁：
「致富智庫」領悟理財/職場智慧，一Click改變一世
「東網Money18」全新功能「板塊追蹤」，助你分析投資先機