午市有股惑：又彈！駿傑難買得落手？

半新股駿傑集團(08188)掛牌以來雖然只係經歷咗4個交易日，但日日都係市場焦點，真係唔簡單！今早就最多彈過4成高見1.55元，一度成為升幅最大港股，成交高達3.75億，究竟該股係寶定係草？

駿傑集團於上月22日上市半日後，被證監會以股份交易似乎沒有一個公開市場為由勒令停牌。公司於本月15日公布復牌建議，由控股股東莊峻岳向不少於150名獨立承配人，配售2,500萬股股份。出售完成後，莊峻岳所持公司股份將由3億股，減至2.75億股，持股比例由60%降至55%，而公眾持股量則由40%增至45%。

由於其股價實在太Chok，相信都唔係好多人關心間公司究竟係做乜？其實，駿傑本身係喺香港從事隧道建造工程、以及提供煤氣管及結構工程的設計與翻新服務。截至去年8月底止8個月，公司營業額增加逾6成至8,479萬元，純利下跌逾3成至504萬元，而2015年則賺1,537萬元。

該股現價1.24元，雖然已較周二復牌當日0.53元低位回升1.3倍，但仍較首日掛牌高位低逾6成，可見跟風炒作呢啲新股的風險！公司理論上解決了貨源過度集中的問題，但睇見公司的業績表現，都真係幾難買得落手。

─ ─ ─ ─ ─ ─ ─

「致富智庫」領悟理財/職場智慧，一Click改變一世

http://money18.on.cc/wealth

「東網Money18」fb專頁：有討論、有分析，齊來FUN享，贏盡●你Like