NET在理財：善用安老按揭　退休無煩惱

東網電視

樓價愈升愈貴，退休要過好日子就愈來愈難，退休人士除了買債券、做存款之外，買收息股都可能驚風險太高，但其實有層樓喺手，唔止可以住，近年仲有安老按揭可以每個月增加穩定收入，《東網》介紹如何利用安老按揭做退休安排，以及拆解大家以為同銀行「對賭」的誤解。

【咩叫安老按揭？】

安老按揭又叫「逆按揭」，即係將住宅物業按畀銀行，但係同一般供樓唔同，安老按揭業主係每個月從銀行收到「年金」，而且可以喺間屋住到百年歸老，即係有生之年都唔會畀銀行收返間屋同唔需要還錢。

【有咩申請條件？】

55歲、有樓、樓齡50年以下、用自己名義持有就得。如果間屋係聯名共同持有，就用聯名形式一齊借。

【每個月可以收到幾多錢？】

業主做安老按揭，每個月收到筆錢叫做「年金」，年金有幾多要睇3件事，分別係物業價值、想收幾耐年金、同一物業多少個人一齊做安老按揭。

首先，物業價值愈高收取年金愈高，不過800萬港元樓上就要打折，如果物業超過1,600萬元，做安老按揭時個樓價就只計60%，上限只係計1,500萬元。

第2，想收年金個時間愈耐，每個月年金就愈少，例如每100萬元樓價，55歲開始做安老按揭，揀收10年年金，每個月就收3,200元，如果想收到百年歸老為止，即係同年金計劃鬥長命，每個月就收到1,650元。舉例如果物業價值500萬元，就將上述個年金乘5倍。

最重要係：

收完年金係唔會畀銀行收樓！

業主可以繼續住到百年歸老。

第3，愈多人一齊做安老按揭，個年金都會相應減少，以上述每100萬樓價，55歲開始做安老按揭同10年期計，1個人借每月年金係3,200元，2個人借就總共收2,800元，3個人借就2,500元。

其實《東網》已經準備好安老按揭下樓價點計嘅表畀大家參考，對返自己情況就得。

【間間銀行都有得做？】

如果覺得安老按揭適合閣下，可以去銀行申請，不過香港唔係每間銀行都有提供呢個產品同服務，只有7家銀行有，分別係中國銀行(香港)、上海商業銀行、永隆銀行、交通銀行香港分行、東亞銀行、富邦銀行(香港)、南洋商業銀行。

要睇邊家銀行分行有得申請同查詢電話，可以睇呢個網址：

【係咪同銀行對賭？】

坊間有人誤解安老按揭係「將間樓按畀銀行，收完錢老來無樓住」，或者「收取年金總額低過樓價已經百年歸老，益晒銀行，不如賣咗間樓」。

事實上，由於業主收取完年金，係唔會畀銀行收樓，同樣住到百年歸老，已經達到「老來有樓住」同「增加穩定退休收入」兩大目的，其次係賣樓套現就會失去物業居住權，難以同安老按揭相比。

當安老按揭的業主百年歸老後，銀行會將物業出售，扣除過往年金同保費等支出，餘下金額會歸還予遺產繼承人，如果賣樓所得低過以往年金同保費等支出總額，差價就由按揭證券公司「填氹」。

【有咩支出同費用要收？】

安老按揭係會收取利息同保費，但會在業主百年歸老後才會從出售物業的金額中扣除，即是敍做安老按揭毋須在有生之年繳交利息同保費。

不過，敍做安老按揭涉及法律同輔導費用，或超過50年樓齡可能要支付驗樓報告費用，而銀行近排有唔少優惠提供畀安老按揭客戶，津貼埋呢啲費用，仲有現金回贈！究竟唔同銀行有咩着數？留意下星期一嘅《NET在理財》啦！

─ ─ ─ ─ ─ ─ ─ ─ ─ ─ ─ ─

東網已全面支援360影片及相片，讓你全方位睇盡新聞大事，恍如置身現場，立即登入東網360專頁：http://on.cc/360/

「東網Money18」全新功能「板塊追蹤」，助你分析抓緊投資先機

「致富智庫」領悟理財/職場智慧，一Click改變一世

on.cc東網