孖妹S檔案：大媽炒股網 活用有「錢」途
20170423
東網電視
更多新聞短片
做人最緊要貼地，但你有冇諗過用「離地」嘅方法炒股，有機會發掘到另一片小天地？自從滬港通通車後，大媽加入港股股海搵食，北水力量絕對唔嘢少，另外，其實有唔少香港股友已深入內地投資討論區攞投資靈感，內地股友亦會喺呢啲架步力求吸盡港股資訊精華、隔山打牛，但係靠呢啲資訊甚至係貼士，究竟可以賺死你，定係輸死你？點樣先可以避免中伏？
─ ─ ─ ─ ─ ─
●【玩雪球網3年】互動強 集民間智慧
市：散戶Blog王 市場先生
彩兒：你2014年開始進駐雪球網，成為分析專家，依家粉絲數目都有4萬幾人，嘩，好勁喎！
市：當初開始喺雪球玩，係因為發覺普通Blog嘅互動性不足，普遍若然有兩、三千個讀者就已經好勁，而且香港冇一個平台提供個股討論，當時發覺有幾個Blogger朋友，除咗喺自己個Blog之外，仲會喺雪球分享，所以我就跟住試吓，最初係以分析A股為主，後來就慢慢講番自己最愛嘅資產折讓股。
市：雪球有度好，佢除咗網頁版外，仲有埋手機App，搭車或者喺街一諗起有乜好嘢，都可以即刻打幾句同粉絲分享，唔同寫Blog咁長篇大論，而且仲可以即刻睇吓啲回應添。
Kitty：老老實實，上面有咁多專家同網民推股，有冇試過跟貼士買股賺錢先？
市：入面有好多網民鍾意提供分析，其實呢啲就等同民間智慧，唔同嘅股份原來喺民間都有專家，佢哋會用網名、筆名出分析，每隻股都會有重心分析佢盤生意同箇中嘅資訊......你諗吓，香港有好多股都係同內地有關，好似內房股咁，佢啲盤喺大陸，內地網民仲熟過你啦，分分鐘個盤就喺佢屋企隔籬！樓盤質素好唔好，可能佢就係用家呢！
市：我會喺雪球搵投資靈感，最近有雪球嘅網友叫我睇香港建設(00190)，跟住我就自己再深入睇佢業績，其實佢PB(市帳率)好低，研究嗰陣只係0.2倍，我其後就分段買入，平均價係4.51元，依家佢係我三大持股之一，其餘兩隻分別係建業實業(00216)同埋彩星集團(00635)。資產折讓股佔組合超過9成，年初至今整體組合回報有18%。
彩兒：有冇人試過畀啲財技股你「歎吓」？
市：咁又唔會喎，因為大家都係價值投資者先會走埋一齊，網友覺得股份平又啱我風格先會問我意見，同埋有時佢哋見你嘅研究資訊有價值，就會用打賞功能去支持你，特別喺大時大節會有紅包，功能推出至今收到兩千幾蚊左右。
呢啲討論區資訊有真有假，任何平台都會有人別有用心去推不良資訊，所以你永遠要自己再做分析，唔可以預期有人幫你做過濾，最重要係建立自己分析能力，我總係覺得，投資應該捨難取易，簡單就是美，我就傾向揀投資資產嘅股份，多過追求盈利嘅股份，睇前者你可以實地考察，如果佢中環有幢商廈，你就可以去睇吓，留意水牌，就可以知道租戶質素；後者就要諗埋佢點搵錢，咁就複雜好多啦！
─ ─ ─ ─ ─ ─
●【玩雪球網半年】「球友」動態一目了然
巴：投資Blog「巴黎的價值投資」Blogger 巴黎
Kitty：你喺雪球網打滾大半年，就有兩萬幾個粉絲，點吸粉絲，你係偶像派定實力派？
巴：當時都係市場先生介紹我玩嘅，內地投資討論區嘅港股討論，比起香港同類嘅討論區仲熱鬧，雪球係幾吸引嘅，因為佢可以做到一站式資訊，佢叫「動態」，每日會好似臉書咁更新，內容會包括你追蹤咗嘅球友們正在討論嘅文章，佢哋關注咗嘅股票，同埋市場上有關你個人組合以及關注股票嘅新聞，另外仲有佢哋嘅公告。
雪球首頁「頭條」欄目，每日都會登出一啲有水準嘅文章，其中都包括球友寫嘅，一旦文章被揀中成為頭條，就會吸引其他球友關注，我個人有唔少文嘅點擊超過十萬，有啲更加有三十幾萬，同一篇文放喺Blogspot可能只得兩千人睇。
除咗「動態」頁外，仲有必備嘅「市場行情」同「個人組合」，呢個組合係公開畀其他球友睇，若做得唔好，好快就會畀人知道。有時睇球友評論，我都會檢查對方嘅組合表現係點，例如回報係點，係咪夠分散，若高回報但只得一隻股嘅話，我通常都會敬而遠之；若對方嘅組合分散又有好回報，就有說服力，畢竟股市始終要實戰決勝負，如果口若懸河似層層，但連組合都冇個，始終差啲啦。
彩兒：內地唔少投資資訊網引到大媽炒港股，當中有唔少北水觀點，你有冇試過中伏？
巴：我希望透過雪球更了解內地A股市場，個人較為小心，目前為止仲未試過因為呢啲討論而去買股票，我會更享受睇球友分享嘅大師級投資哲學文章，投資講求思考能力，呢方面嘅閱讀幫到我唔少。價值投資呢門投資法喺香港算係小眾玩意，好似我咁硬頸嘅方法就更難流行，不過，喺內地就算唔興，人夠多嘛，所以只玩大半年就有呢個數目嘅粉絲，好有鼓勵。
─ ─ ─ ─ ─ ─
●內地最Hit投資網係邊三強？
1、淘股吧：短炒至上 老手聖地
想緊貼北水去向，梗係要追貼大媽們嘅炒股「品味」啦，以下網站唔長駐都要朝聖一下！
淘股吧係短炒集中營，啱晒鍾意刺激嘅股友，當中股友幾乎全部都係技術派嘅短炒人士，投機族嘅地頭。網站氣氛嚴肅，多資深投資者出沒，專炒消息、概念，新手唔好亂跟風。
2、雪球網：交流平台 分析到位
雪球網係由社交平台起家，最初係畀內地散戶交流心得，重視方法論，內地散戶多數都話「分析還是雪球到位」，入面不乏香港投資高手，近年吸引香港Blogger進駐。
3、同花順：設交易系統夠方便
內地唔少財經網站都有交易系統，但不得不提嘅係同花順(300033.SZ)，佢2009年喺深交所創業板上市，近年熱爆，同花順長期佔據內地炒股App下載首位，仲支援大部分內地券商服務，可以直接喺App入面Trade添。
─ ─ ─ ─ ─ ─
●內地股友唔會信晒投資網
阿康：間中關注 拒亂跟風
「內地比較出名嘅論壇有同花順、新浪財經等，內地大媽式炒法係比較鍾意追熱點，我間中都會關注吓嘅，但唔鍾意追捧，因為覺得啲熱炒概念都係嚟得快、去得快。就好似之前嘅雄安概念股咁，我覺得喺自己有更好嘅能力去拿捏之前，都唔會亂跟風，我一般都係長揸藍籌為主，咁樣可以減低中伏嘅風險。」
廖生：少睇內地 偏愛港網
「我一向都好少睇內地投資網站，因為我冇時間慢慢睇網民嘅留言，自己主要都係睇新聞嘅消息去炒港股，之前有部分討論區推完股之後爆煲，例如漢能(00566)咁，同埋聯眾(06899)嘅假消息等，所以總會有啲敗類喺入面，自己一定要分析同判斷，我自己就反而會留意香港嘅投資網。」
─ ─ ─ ─ ─ ─
「東網Money18」全新功能「板塊追蹤」，助你分析抓緊投資先機
「致富智庫」領悟理財/職場智慧，一Click改變一世
東網已全面支援360影片及相片，讓你全方位睇盡新聞大事，恍如置身現場，立即登入東網360專頁：http://on.cc/360/