睇樓逐呎度:華康大廈3房戶「神奇則」

20170604
東網電視
更多新聞短片

呢期最Hit《神奇女俠》,而今次《睇樓逐呎度》有樣學樣,帶大家一睹北角華康大廈單位嘅「神奇則」。

嗱!呢個單位原為3房開則,點解叫做「神奇」則呢?最奇妙嘅地方在於廳房皆無主力牆,業主想點拆就點拆、想點間就點間,絕對係隨心所欲,好似目前單位業主就間咗1房出嚟!當然喇,如果將來想改圖則,最好搵埋「好打得」嘅Wonder Woman幫手,想改則真係話咁易!

今期《睇樓逐呎度》走訪嘅單位實用面積397方呎,實用率約78%,全屋冇窗台設計,內籠見使好用。甫入大門,先經過浴室及廚房進入廳堂,由於業主將浴室旁邊嘅房間牆身拆掉,將空間全部歸入廳堂,令廳長增至14.85呎,空間感十足,擺放大型家具冇難度。

業主特別將兩個房間打通成1個大房,放置大床、衣櫃及書桌後,仍有充裕嘅走動空間。最值得一提嘅係,房間最大特色係多窗戶,令到室內更加光猛舒服。但美中不足嘅係,浴室及廚房空間偏細,尤其浴室只有2.7呎闊,感覺侷促;廚房亦僅得4.95呎長,地方略嫌淺窄。

世紀21日昇黃文龍表示,雖然金管局出招遏樓市升勢,但由於北角區盤源短缺,業主叫價仍然硬淨,如上月初華康大廈入門盤仍叫648萬港元,現時已反價至690萬元。物業對上一宗成交為今年3月錄得,單位為高層B室,實用面積426方呎,成交價583萬元。

坐落於北角堡壘街嘅華康大廈,樓齡33年,鄰近英皇道及港鐵炮台山站,衣食住行便捷。物業為區內少有主攻3房單位嘅單幢式住宅物業,實用面積介乎362至426方呎,除了頂層有小量兩房單位外,其他為3房間隔。

------
東網已全面支援360影片及相片,讓你全方位睇盡新聞大事,恍如置身現場,立即登入東網360專頁:http://on.cc/360vr/

香港樓市日日新鮮,話題多多,想睇晒最update樓市新聞短片,即刻click入 http://bit.ly/1M2kP95

樓市乍熱,想睇更多一、二手樓精彩故事,即click以下連結:

新盤置啱睇
http://money18.on.cc/newflat/

二手置啱Feel
http://money18.on.cc/usedflat/