孖妹S檔案：那些年有幾甘 紅衫仔與你重溫
20170910
東網電視
更多新聞短片
經典神劇《大時代》以港交所交易大堂作為主打場景，不過，男主角丁蟹着住紅背心喺場內奔跑落盤、千人齊叫「升、升、升！」嘅場面，現實上隨住交易系統進步、紅衫仔愈來愈少，昔日光輝一去不返，交易大堂下月尾亦敵不過時代巨輪，正式完成31年歷史任務，紅衫仔亦會絕迹於股壇，象徵一個時代嘅終結。
【現役紅衫仔：1987年入行 經驗值30年】
●交易櫃台貴租趕客上樓
舒：滙達證券出市員代表 舒義娜
彩兒：「摘去鮮花，然後種出大廈，層層疊的進化，摩天都市大放煙花……」唉，我慨歎到忍唔住要唱番支歌先！
舒：哎啊，我都好唔捨得以後冇咗交易大堂啊……當初我喺1987年入行做紅衫仔(出市員)因為爸爸開證券行，而我就讀緊中六，佢話請人好難、等人用，所以冇再讀落去，為幫佢手入行一直做到依家，轉吓眼就30年喇！當時交易大堂大到不得了，唔似依家咁細，曾經有成千幾個紅衫仔，好熱鬧，依家成個場得番62個交易櫃台係有證券行租，每日落嚟嘅紅衫仔得番約30人咋，另外30個位基本上係用作後備，因應租枱愈嚟愈貴，好多都搬晒上公司落盤，冷清咗好多，我哋就係最後一批紅衫仔喇，時代變喇，我之後要搬番Office做嘢。
舒：其實呢份工幾好做㗎，你知啦，呢行搵錢其實係Easy Come，Easy Go，番工時見到自己買咗嘅股份勁升，又有一大班人一齊好熱鬧、好開心！以前剛入行係半自動對盤，要靠電話，到1993年有第一代自動對盤及成交系統(AMS/1)起，自此功夫少好多，而且以前開市時間係「黃金四小時」10點到12點半；2點半到4點，好多時間去Relax自己，近幾年愈加愈長至5.5小時，我一陣放工都要趕住去做運動Keep Fit啊！
Kitty：嘩！你一入行就撞正八七股災，好刺激啊！當年發生「十月股災」，由10初至12月初計，恒指累跌超過五成！
舒：發生股災、大跌市嘅時候，人人都心急落盤，試過場內壞電話線，搞到成班紅衫仔跑嚟跑去做盤，間中都有人跑到跌親。八七股災嗰陣就印象深刻，當年美股大跌引發全球連鎖式恐慌性拋售，聯交所宣布停市四日，去清理未完成嘅交收，好彩有嗰四日，因當時仲係實物股票交收，收支票做交易，所以啲文件堆到成座山咁高！呢啲人手登記嘅年代，我足足四日冇瞓，喺場內做完就返公司，返公司做到天光又返市場，好彩最後都妥當地做好晒。
舒：去到2007年，因為「港股直通車」消息，港股狂升，雖然場內已經有自動對盤，不過交易系統都試過塞車，好難操作，搞到成班紅衫仔都好緊張。
─ ─ ─ ─ ─ ─
【現役紅衫仔：1997年入行 經驗值20年】
●網上及手機Apps落盤打殘
孫：出市員 孫小姐
Kitty：你以前唔係做金融㗎喎，又會無啦啦做咗紅衫仔廿年？
孫：我1997年股市最旺嘅時候轉做金融業，初入證券行做嘢，係做客戶服務先，然後老細見我手快腳快，做咗兩、三個月就調我落交易大堂做紅衫仔，落場多年，去到2015年打後就唔係日日落去喇，皆因時代變，好多人都係網上或用手機Apps落盤，紅衫仔要被市場淘汰㗎喇！唔少行家都轉咗做全職炒家，自己喺屋企炒股。
孫：紅衫仔呢份工，我最鍾意佢五天工作，準時收工，仲可以放公眾假期，收市後Print番啲Statement拎番公司就撇得，工作日日清，多私人時間，人工又好過做文員，落場坐唔同喺公司，冇王管，所以最開心就係落場嘅時間！不過，我對自己要求好高㗎，多年嚟，錯盤唔超過3次！但係試過有客打嚟落盤，完成交易後，我覆佢電話竟然話自己冇落過，真係嬲爆。
彩兒：原來由2011年11月底起，交易櫃檯月租要成7,250元！
孫：傻豬，紅衫仔其實都係Dealer嚟，交易大堂櫃檯租金愈加，就愈少證券行租，而且推出第二代終端機起可以放喺公司用，紅衫仔慢慢變得可有可無，近年我專湊大客，佢哋要求落盤要快的話，我先會去場內開工咋！Hey！其實依家散戶少咗參與，成交又唔多，成日都拍晒烏蠅，一五年大時代情況都一度好轉嘅……我都有啲懷念九七年全場人一齊嗌冧巴嘅墟冚情景。
【退役紅衫仔：2000年入行 經驗值6年】
●現場大把風收？流料居多
李：金牌經紀 李偉傑(Jason)
彩兒：最衰2000年未興Selfie啦，你一張着紅背心嘅相都冇。
李：紅衫仔印住嘅冧巴係證券行代號，我以前嘅紅背心冧巴係3030！紅衫仔係我入行第一份工，當時大部分紅衫仔都係前輩，我24歲應該數一數二最Young，好彩2000年推出咗第三代終端機，公司畀機會新仔落場，嗰陣交易大堂仲未大裝修，係正方形，有幾百人喺入面，若個市或股份有異動，場內氣氛就似足投注站睇賽事咁，喺場外隔住玻璃都聽到入面好大聲！
李：我入行都有少少受劇集《大時代》影響，以為入面可以收到好多風，後來先知十次有八次都係流料，哈哈，要自己過濾吓先得。以前四會時代交易會打手勢，但我入行已經係自動對盤，電視劇入面跑嚟跑去嘅情景好少出現，即使有都係Dealer趕住去廁所啫。以前Lunch Time時間長，我梗係「爭分奪秒」啦，用嗰兩粒鐘喺場內瞓晏覺。
Kitty：你入行撞正科網股泡沫爆破，公司咁都請你？
李：我見工當日大市仲跌近千點，好彩最後都請！2000年場內最轟動就係電訊盈科(00008)前身盈科數碼動力「蛇吞象」收購香港電訊後，股價喪插，場內成幾百人一齊爆粗喪鬧，呢個時期都算係最狂喇！
李：當年交易大堂有兩大蒲點，茶水檔同埋煙房，茶水檔係極受歡迎，趕時間就會幫襯佢買早餐或午餐，而煙房就有好多老前輩打躉，由於佢哋太有氣勢，我唔敢入去收風㗎。其實初做份工幾大壓力，會騰雞，後來習慣咗就淡定，都幫到依家氣定神閒咁操盤，嗰陣減壓就會同行家齊齊去飲酒，好多時六點飲、八點就醉晒。
─ ─ ─ ─ ─ ─
「東網Money18」全新功能「板塊追蹤」，助你分析抓緊投資先機
「致富智庫」領悟理財/職場智慧，一Click改變一世
東網已全面支援360影片及相片，讓你全方位睇盡新聞大事，恍如置身現場，立即登入東網360專頁：