二手公居屋上車　DIY「驗樓五部曲」免中伏

東網電視

樓價高企，近年連公居屋也成為搶手貨，日日錄新高價成交。不過，這些居所普遍樓齡不輕，內籠質素參差，置業者一不留神買來爛樓，真係喊都無謂。今期邀來星級驗樓師，教置業人士DIY「驗樓五部曲」，買個住得安心的安樂窩無難度。

私樓樓價愈升愈癲，吸引不少置業人士向樓價較相宜的公居屋「埋手」，加上愈來愈多公屋租戶擔心富戶政策收緊而加快入市，令公居屋自由市場及第二市場轉活。

利嘉閣地產研究部主管陳海潮表示，較受置業人士歡迎的居屋市場，近幾年每年買賣介乎約4,200至近6,000宗，雖然今年因樓價高企及放盤短缺等影響，令交投回落，但估計今年全年仍達4,500宗水平，可見置業需求殷切。

不過，公屋及居屋樓齡普遍「有番咁上下」，內籠難免老化，隱藏問題多，若不幸買到爛樓，恐怕大把手尾跟。以下是兩大星級驗樓專家詹濟南「詹Sir」及賴達明「明哥」為置業人士示範的驗樓「五部曲」，由浴室、廚房、露台、房間以至客廳逐區驗，講解要注意的地方，減低「中伏」機會。

【廚房：開水有雜質宜換喉】

舊式公居屋廚房多數用鉛水喉，詹Sir稱，太舊的話一開水喉就有鐵銹、雜質流出，一定要及早更換水喉，以免影響健康。電線位很多時走「明線」，外觀雖不好睇，但只要摸落去電線面軟身，仍可繼續使用。另要敲下廚房門，以測試是否用有防火功能的實心門。

另外，明哥提醒，一般公居屋的廚房會有一組垂直貫穿各層的公家喉管，若有滲水等迹象，要及早聯絡有關方面維修。

【露台：敲地台聽聲試防滲】

不少公居、居屋單位都會附連露台，詹Sir稱要留意天花有否水漬，如有的話會「留白」，即水遇到石屎後產生的化學反應，代表樓上有水滲下來的迹象。此外，要敲下地台聽聲，以測試防水情況，若防水失效會有滲水落樓下風險。

另外，要測試晾衫架穩不穩陣，有些舊式設計只靠一條繩及一舊尖木固定晾衫架，若尖木老化與接駁位鬆脫，晾衫架就有跌落街的風險。

【浴室：殘得最快格外留神】

詹Sir指，公屋居屋驗樓差別不太大，睇浴室最緊要，因乾濕冷熱交替，殘得最快，要睇天花及瓷磚，如後者實淨，反映樓宇質素不太差，翻新一下用得番。跟住睇水喉，見到鉛水喉一定要換。然後開浴缸「生口位」睇睇裏面情況，測試有否滲水等迹象。

明哥則認為，浴室水氣大，不妨用五蚊銀去敲打測試牆磚，如果聲音較響亮代表是空心牆磚，有潛在剝落風險。

【客飯廳：勿信眼見要敲天花】

睇廳房牆身及窗口有否漏水是驗樓的重要一環，詹Sir表示，近窗口的牆身見有明顯水漬，有機會屬於結構性漏水，嚴重的話建議將整套窗更換，重新塗上防水膠。

另一種滲水來自冷氣機石屎窗台，主要因為冷氣機安裝不佳，大風大雨時雨水很容易從冷氣機底滲入屋，謹記裝機之前做好擋水，及機底塗好膠防水就問題不大。

另外，雖然眼見廳內牆身及天花無問題，但都要敲吓佢，靠聽聲分辨牆壁是否空心，如果空心代表石屎老化，一些嚴重例子出現鋼筋外露兼嚴重侵蝕，維修費就貴好多。

【房間：留意牆身有冇滲水】

明哥稱，要特別留意浴室隔離的房間，尤其近浴缸位的房間牆身一定要睇，若然有牆身滲水、發霉等情況，代表浴缸附近的防水失效，嘗試在浴缸淋水找出漏水位置。

詹Sir指，舊式公居屋通常採用鋼窗，結構硬淨不用擔心跌落街，只有改善防水及生銹問題，一般可多用十多廿年，想慳筆裝修費大可留用，惟要留意防水及隔音效果較差，想改善就要改裝鋁窗。