【孖妹S檔案】用AI管理ETF 贏硬股神？
20171112
東網電視
更多新聞短片
人工智能(AI)出沒注意！網上早前瘋傳一段片，係一個像真度極高嘅女性AI機械人，獲沙特阿拉伯授予公民身份，佢對答如流，面部流露人類表情，孖妹即諗起英國著名物理學家霍金嘅警告，佢話AI係人類史上最糟糕嘅事件，仲估計AI將會接管金融行業。咁呢排咁興嘅AI選股，有冇搞到金融人騰騰震？
Andy：晉裕環球資產管理投資研究部策略師 黃耀宗
Alex：豐盛金融資產管理董事 黃國英
Raphael：Horizons ETFs Management(Canada)Inc.助理副總裁 周志燧(Raphael)
─ ─ ─ ─ ─ ─
●兩ETF在美上市 智能揀股
Kitty：講起AI，你會諗到咩？
彩兒：Google研發嘅人工智能棋手Alpha Go幾乎擊敗所有棋王！你隻基金怕唔怕被AI打低？
Alex：無人駕駛、做打遊戲機對手，都係用緊AI系統。AI投資確係趨勢，但我隻基金今年都賺近五成，唔易被打低。
市場調查機構IDC指，全球的認知及AI系統投資在2021年將達到576億美元，預計2016至2021年AI投資金額嘅複合增長率高達50.1%。AI應用領域廣，零售業同金融業就係AI投資最多嘅產業，料2017年喺金融領域嘅投資金額將達17.2億美元。
Kitty：AI點樣幫到金融業發展？
Andy：AI識選股，透過學習同分析多年數據同經濟周期等，自製一個投資方法揀股。
Kitty：好堅呀，可唔可以講多啲我知。
Alex：當然可以！AI比人類叻嘅地方係，佢唔會攰。你知喇，就算Kobe Bryant(高比拜仁)咁勁，佢都唔可能場場波81分啦。
Kitty：你哋公司今個月剛推出咗由機器人管理嘅全球股票ETF Horizons Active AI Global(美股：MIND)，咁你一定好清楚AI有乜咁巴閉？
Raphael：人會恐懼，但AI唔會，因為佢冇情感。比起投資公司用開嘅電腦程式系統，AI系統嘅過人之處就係識不斷學習，從失敗經歷中學習，然後改良選股方法並重整組合，咁就避免犯同樣錯誤喇！相反，電腦程式好冇彈性，所有嘅選股條件一早預設好，所以就算佢上次做錯完，今次都可以照樣錯。
彩兒：咁投資啲咩先捕捉到AI先機？
Kitty：騰訊控股(00700)都應該要揸啩。
Alex：當然喇！騰訊嘅智能聊天機械人幾正！其實中美科網巨頭，BAT(百度、阿里巴巴及騰訊)、Facebook及亞馬遜等都值得買，可合共佔投資組合20%。因為佢哋均有其他收入來源泵錢搞AI，唔急住將AI功能變現，專心搞好AI用戶體驗，所以唔排除佢哋會整到啲具爆炸性嘅嘢出嚟。
Kitty：有條件真係唔同啲。
Alex：另外，唔好睇少BAT，佢哋有紥根中國嘅優勢，中國人口接近14億，有龐大數據畀佢哋培育AI，所以AI發展，可以極快速。
彩兒：Alex，我聽聞你今年賺唔少，你嘅基金投資組合入面，AI貢獻得多唔多？
Alex：頭先講咗，中美大型科網股佔20%。依家砌人工智能硬件係一個潮流，所以AI ETF(交易所買賣基金)係其中一個好選擇。多數AI ETF成分股都包括機械人及晶片製造商，但坦白講，晶片股例如NVIDIA(英偉達)(美股：NVDA)及ASM太平洋(00522)嘅股價會比較Chok，所以唔好落重注。我建議投資者買AI ETF之餘，亦可投資賣零件畀晶片製造商嘅公司，兩者加埋佔投資組合10至20%。
Kitty：其實AI ETF係咩？(一頭霧水)
Andy：問得好！首先要分清咩係AI ETF同AI主題ETF。AI ETF多數係主動型，即係利用AI技術主動管理股票，就例如專投資美股嘅AI Powered Equity ETF(美股：AIEQ)同MIND。AI主題ETF就投資喺啲AI概念股，亦即係你最熟悉嘅科網股，包括Google、騰訊及亞馬遜等。
Andy：睇Google同Tesla嘅AI發展前景，就要留意美國政府畀佢哋邊個行先，有First-mover advantage。
彩兒：AIEQ上個月先上市，頭三日表現唔錯，跑贏美國兩大指數，不過之後就唔係好掂。
Kitty：一時賺、一時蝕，究竟AI系統叻唔叻？
Alex：坦白講，AI ETF真係幾新，無咩Track record，好難判斷掂唔掂。再者，今年港股及美股狂升，喺牛市係分辨唔到你係AI定師奶。
Andy：好似AIEQ，只係由AI篩選股票，最後都係由人去決定。表現好嘅時候，幾多Credit畀AI，幾多Credit畀人類，真係一個謎！
所以，我公司暫時無揸AI ETF，但就有揸住AI主題嘅ETF例如易亞中概股(03161)。易亞中概股今年內升近70%，持股包括網易、阿里巴巴、百度等。
─ ─ ─ ─ ─ ─
●業界推MIND 睇中揀股技術
Kitty：AIEQ同MIND個名我未聽過......
Andy：AIEQ由美國初創公司EquBot建立，由IBM嘅AI平台「華生」(Watson)模仿一群華爾街分析師點研究股市，最後再由人手作最終決定。十月十八日，專投資美股嘅AIEQ就開始進行交易。MIND就被稱為世界上首個由機器人管理嘅全球股票ETF，十一月一日喺多倫多證交所交易上市。
Kitty：MIND好有噱頭，究竟佢有幾堅？
彩兒：梗係要請教吓佢嘅發行商啦。
Raphael：MIND嘅AI系統係由韓國母公司同大學合作開發。佢係純AI操作，投資於唔同國家嘅ETF；按外圍經濟環境，先決定投資喺唔同國家例如中國、美國同歐洲等嘅比重，再決定每個國家嘅ETF配置。
Kitty：AI咁叻。大膽投資開發AI嘅AI概念股咪前程錦繡？
彩兒：嘻嘻！佢想問，MIND有冇特別揀多啲AI概念股？
Raphael：同人一樣，AI做每個投資決定都要考慮好多因素，例如預測環球市場走勢等。我哋推出AI ETF嘅原因，正正就係睇好AI嘅選股技術，所以我哋唔會干涉AI嘅選股，人為影響AI概念股嘅配置。
Raphael：但可以話你知，MIND係有投資唔同類型嘅指數ETF，包括納斯達克100科技分類指數入面嘅幾隻ETF。其他重點配置亦包括ISHARES RUSSELL 2000同S&P 500指數ETF等，都係啲比較穩陣嘅股份。
彩兒：MIND只投資全球股票，會唔會唔夠分散風險？
Raphael：唔使擔心。MIND雖然無買股票以外，例如大宗商品等避險資產，但MIND都有後着，一旦覺得環球市況唔適合投資，AI就可以喺投資組合配置最多30%現金，做到進可攻，退可守！另AI每個月都會按需要重整股票組合，當然目標無變，都係求最低風險，最高回報。我相信AI嘅眼光！
彩兒：你哋會唔會陸續推啲新AI ETF？
Raphael：或者會！今次推出MIND，真係好創新，係公司首個推出嘅純AI產品。坦白講，MIND嘅AI系統好新。但見北美市場對AI ETF有需求，除咗機構投資者，唔少零售投資者都好Ready去買，所以我好相信AI潛力無限，有信心AI ETF會愈嚟愈受歡迎！
─ ─ ─ ─ ─ ─
《骰寶坊》誠邀各地【賭王】【賭后】挑戰神人境界，每日更有百萬籌碼等你領取！
立即免費下載，體驗《骰寶坊》最真實、刺激的多人在線骰寶遊戲！
遊戲下載： https://goo.gl/7JP2hm
「東網Money18」全新功能「貼市貼士」，助你掌握投資先機
「致富智庫」領悟理財/職場智慧，一Click改變一世
新股上市消息資訊，不停為你update，即刻click入