古勝：中資金融股輪流發力
20180124
東網電視
更多新聞短片
中信證券
古勝在東方產經「MARKET INSIGHT」專欄中表示，恒指連續第五個交易日創歷史新高，國企指數則連升第十八個交易日。股王騰訊(00700)股價繼續破頂、港交所(00388)繼續一步步朝歷史高位進發，工商銀行(01398)及建設銀行(00939)則齊齊創出歷史新高。總之，唔信個市唔回而繼續等的話，就只有繼續呆呆地等！
屈指一算，今年頭揸張恒指期貨合約，至周二為止帳面最多賺逾14萬元，堅係「日日賺」﹗睇呢幾日形勢，恒指回吐過百點就要買，而且下午三點前好完成，否則歐資一掃貨又搶貴咗。仲有，呢期興逢收市競價時段嚟挾個全日高位收市，周二主板成交更達到1,979億元，可見班芬佬真係堅買貨。所以點都好，認為自己賺夠唔想揸貨，都千祈咪做淡友。
呢期人仔強而美元弱，但美國聯儲局將會加息同縮表，到底美元食錯咩藥？人仔又憑乜嘢持續強勢？這些都是淡友看不明的，可這卻是鐵一般的事實。似乎「侵侵」政府會力控美元同債息在一定範圍內，且別小覷美國長期吸金能力。
人仔匯率尚未完全開放，但資產價格不斷隨匯率上升，不利競爭力之餘，亦等同繼續吹大泡沫，後續發展如何？也許不是今年，就是明年會有答案。當然，呢一刻大市炒到火紅火熱，有智慧不如趁勢亦有道理。總之大家記得，呢啲人山人海的大時代，跟勢炒無錯係無可厚非，但最緊要係風險管理不能鬆懈，要妥善控制槓桿水平，有心理準備應對突如其來的大風浪。
滬綜指唔聲唔聲經已去番3,500點樓上，即一五年末季的水平。指數於3,800至4,000點肯定係一個阻力唔細的大位，係咪6月A股入摩前可以一試，古勝都冇水晶球，但至少喺季內，A股繼續穩步向上的概率仍大，兩地金融股可以繼續睇好。
見到周二北水數據，資金力吸建行、騰訊及中國銀行(03988)，睇落其實券商股真係落後，但見到周二中信證券(06030)居然逆市微跌，海通證券(06837)亦僅微升收場。再睇番幅走勢圖，其實兩隻股由上月低位上嚟升咗唔少，中信證券由16元水平升到上高位見20.95元，突破咗一五年末季以來的阻力位，當啲資金集中火力掃內銀的時候，信證抖抖氣都好正常，想買貨就要把握時機。
另外，值得一提的還有中金公司(03908)，騰訊已入股成中金第三大股東，相信有助加強在零售的覆蓋，有助推動其證券經紀、資產管理及孖展業務。事實上，隨着A股入摩，未來將有更多國際投資產品覆蓋A股，股市交投趨活躍，預計中金今年整體投資收益率預測有上調空間。
同時，仲未計及中金公司喺前年買入中投證券，雖然市場一度擔心兩者業務併合進度，但喺非旺市時買入一項咁大的證券資產，若然嚟緊證券業真係有景，點計都係利好。還有一點市場未係太留意的，乃中金亦有條件成為H股全流通試業企業。故橫睇豎睇，呢隻都應該係券商股的股膽之列。
─ ─ ─ ─ ─ ─
「東網Money18」全新功能「貼市貼士」，助你掌握投資先機
「致富智庫」領悟理財/職場智慧，一Click改變一世
「互通餘額」數據，助你掌握北水動向