孖妹S檔案︰股票變晒蟹貨？專家教你要點做
20180805
東網電視
更多新聞短片
做得長線投資者，一般都係性格樂觀、憧憬世界會更美好嘅人。不過，最近港股被中美貿易戰陰霾籠罩，持續無起色，仲要打破「五窮六絕七翻身」嘅常態，恒指7月跌1.29%。散戶由長情股民淪為蟹民，成績表滿缸紅，究竟會有幾傷心？等孖妹邊八吓，邊同佢哋打打氣啦。
林：國農證券董事總經理 林家亨
－－－－－－
●散戶陳先生︰轉炒牛熊 每注廿萬元
陳：長揸係好無奈嘅事。仲要揸住二十隻股份咁多，好困擾。
Kitty：樂觀啲！雖然輸咗錢，但贏咗個精靈腦袋吖！
陳：炒股幾十年，我依家揸住廿幾隻蟹股，如易鑫集團(02858)、御泰中彩控股(00555)、盈大地產(00432)及中國軟實力(00139)，多數係三、四線股份。當中蝕得最多應該係中國軟實力，喺股價一毫及兩毫分注買入，共投資超過二百幾萬元，依家只有幾仙，好傷啊！
彩兒：當年點解買佢？
陳：當初買入中國軟實力，無考慮其基本面，純粹當炒。點知就跌眼鏡。有啲股我會止蝕，但目前呢廿隻蟹股嘅股價都幾低殘，暫時係焗住揸。依家我唔再炒其他正股，日日睇實呢堆股，若佢哋真係炒上，而且上到差唔多，就會睇位沽貨。但若股價再插，我會考慮低撈溝貨，希望最後蝕得無咁甘。
Kitty：溝貨好危險！會唔會係無底深潭？
彩兒：總括咁多年成績，你係賺定蝕？
陳：蝕錢居多，但都玩咗幾十年，我都就快70歲。而對上一個廿年都係全職炒股，日日都炒，生活習慣好難話改就改。再者，我啲蟹貨仲蝕緊，洗濕咗個頭，點可以唔玩？當蟹股全部返家鄉時，我就畢業喇。其實我都幾悲哀，同股票行同病相憐。股票行業務愈縮愈細，仲要捱貴租，惟有大行搬細行撐住。
Kitty：你有無從輸錢中，學到炒股妙法？
陳：依家個市勁亂，屬於政治市，我唔識睇，正股又難玩，只會愈玩愈縮，所以最近我無炒正股，專注炒牛熊證，每注都有十幾二十萬元。計番條數，買牛證易啲贏，但呢幾日例外，買熊證賺咗幾千元。
－－－－－－
●散戶蔡小姐︰懶理蟹倉 照追入騰訊
蔡：我成手蟹貨！唔少大家耳熟能詳嘅藍籌股都有買，原本有錢賺但無沽到，依家咪坐晒艇。例如香港交易所(00388)、滙豐控股(00005)、渣打集團(02888)、中國石油股份(00857)、華潤鳳凰醫療(01515)及麗珠醫藥(01513)等。
Kitty：喺呢個市況下，蟹民多的是！
林：講真，若你手持多過十隻股，會令你難以集中研究，最後恐怕輸多贏少，除非你係基金經理。要賺嘅，其實有4、5隻股就夠。
彩兒：你建議買邊幾隻？
Kitty：蔡太，你啲蟹貨有幾多年歷史？
蔡：我喺唔同時段買㗎。金融股係我至愛，滙控係十幾年前喺120蚊買落；而輸得甘嘅係渣打，幾年前喺220幾蚊買入；至於中金公司(03908)，就半年前喺17蚊買入幾千股。
彩兒：仲有無心情睇股票？
蔡：依家日日仲睇住個市，都無嘢好驚。聽聞科網股唔多掂，但我無理，照追入騰訊控股(00700)，喺356元買，如即日放都即賺，不過我又錯失機會。
－－－－－－
●散戶劉太︰一味揸內銀 食息至上
劉太：十幾年嚟，買嚟買去，都係內銀股最好，跌就由得佢，原因係就算輸價都可以賺息。若連內銀股都驚，都無咩其他股可以買。聽證券分行經理講，內銀股向上，就皆大歡喜，因為多數散戶個倉都有內銀。而內銀股佔我嘅倉逾七成。我特別鍾意買建設銀行(00939)、工商銀行(01398)及中國銀行(03988)等。
林：無錯，內銀股係派息工具，若好耐以前買落，就算股價跌，賺息都賺到笑。年紀大啲嘅股友，放七成投資喺內銀，係唔錯㗎。若係20至30歲嘅散戶，就可以再博少少。
Kitty：劉太，你另外三成買咗啲咩？
劉太：除咗揸住內銀股蟹貨，港交所(00388)亦坐緊艇，當時喺250蚊買，喺270蚊沽咗一部分，其餘仍蝕緊。不過，我哋呢啲好友仍睇好後市，等中美貿易戰陰霾過咗，有信心港交所會返家鄉。
內險及科網股方面，我只能入市過吓癮。我曾買入科網股，但買親都輸，如喺170蚊買入騰訊，150蚊止蝕，輸逾2萬元。加上佢無息派，市盈率又高，所以唔啱我玩。至於舜宇光學科技(02382)，就算我有100萬元都唔會諗。另外，我買過內險股，試過喺40幾蚊買中國人壽(02628)，20幾蚊斬晒。若我有100萬元，雖然數目唔算少，但都唔夠用嚟置業，淨係畀釐印費、裝修費及經紀佣都無晒喇。
－－－－－－
●散戶劉先生︰40年前入貨 蝕錢拒放
劉：我四十年前買北京控股環境集團(00154)，佢前身係香港毛紡。當時以每股1蚊買入1萬股，一直揸到依家。我無理佢，淨係知蝕咗。
彩兒：好耐以前買落嘅股份，都唔知沽定揸好。
林：可以睇每日成交量。若成交少，相信基金都走晒貨，再揸落去都應該係輸。若成交量大，就可以再等等。另外，計一計持貨蝕咗幾多成，舉例股份買入價係5蚊，依家蝕到只有5仙，咁再輸都無得輸去邊，呢個情形買定沽就隨你鍾意。若只係跌一至兩成，可考慮沽出。
Kitty：按機會成本，似乎攞番錢，再揀另一隻買入較划算。
－－－－－－
●城市大學三年級生何進熹︰收息股穩陣 值得持有
有朋友專短炒，好大波幅，一晚可以賺1萬元，但一輸就輸番凸。所以都係穩陣收息股較啱我。
－－－－－－
●散戶馮勇皓︰轉炒殼股 博賺得更多
Kitty：你買嘅殼股全賺？
馮：唔賺一定唔沽。依家輸緊，只因時機未到，所以我會等。其實我依家總共揸住4隻潛力殼股，包括IBI GROUP HLDGS(01547)、亞積邦租賃(01496)、年年卡(03773)，以及應力控股(02663)，帳面蝕少少，但我有信心好快會賺，特別睇好建築裝修股。
彩兒：炒殼股風險高，賺得快、蝕得更快。你要小心啲。
馮：我博今年投資回報逾五成！
－－－－－－
●專家：臨近退休買ETF有着數
彩兒：長揸股票揀咩股最好？
Kitty：可以同我長相廝守嘅，梗係要對我好，派錢畀我使啦。
林：如果就退休，我建議買恒指及A股ETF(交易所買賣基金)，適合長揸又唔使頻頻睇住。
彩兒：但呢啲股票直接反映市況，遇上跌市一定低殘。
林：長揸無有怕。若果佢哋由高位下跌兩成，溝貨都仲得。但如果你買科網股，例如騰訊，佢哋最近跌得多，唔代表會見底回升，由高位下跌三成都唔出奇。
Kitty：散戶陳生有大堆三四線股蟹貨，點算好？
林：預期三四線股短期內唔會好。照理每次入市，大家都會諗定止蝕位，若果揸住嘅三四線股跌穿止蝕位，不妨走走貨先。
彩兒：佢仲有揸易鑫。
林：呢隻係汽車龍頭股，長線我都睇好，我自己有揸住。不過，短期內受美國科網股下跌拖累，以及中美貿易摩擦影響，跑輸大市唔出奇。若揸住行業龍頭股，而你又無套現壓力，喺呢個市況，我建議繼續長揸，等佢升。順便一提，長揸短炒都好，都要留意中美貿易談判氣氛行事。
－－－－－－
《骰寶坊》誠邀各地【賭王】【賭后】挑戰神人境界，每日更有百萬籌碼等你領取！立即免費下載，體驗《骰寶坊》最真實、刺激的多人在線骰寶遊戲！
遊戲下載：
虛擬貨幣新錢途︰
新股上市專輯︰
「東網Money18」全新功能「貼市貼士」，助你掌握投資先機