「神級推銷員」每日幫公司搵12億！有咩秘訣？

東網電視

萊希 (Getty Images圖片)

講到推銷員，好多人都會諗起每月都要跑數嘅Sales，一旦唔足數，分分鐘連份工都冇埋，但如果係月月「爆數」嘅Top Sales，年薪百萬就可能閒閒哋。又如果sell吓吓十幾億嘅飛機都sell到年年爆數，咁就絕對可以話係「神級推銷員」。

全球知名飛機製造商空中巴士(Airbus)嘅銷售總監萊希(John Leahy)就可以話係全球推銷員嘅「偶像」，皆因佢每日平均幫公司賣出兩架飛機，即係幫公司帶嚟1.6億美元(約12.5億港元)收入！你冇睇錯，係「每日」呀老友。

萊希喺1994年成為空中巴士銷售總監。大家咪以為空中巴士多年嚟都只有一個主要對手波音公司(Boeing)，所以生意都好易做；實情係當時波音公司已經食咗60%市場份額；但空中巴士的市佔率僅得18%。

不過，去到1999年，萊希已經成功令公司市佔率升至50%；喺2000年以後，空中巴士銷量高於波音仲變成常態！萊希喺空中巴士任職咗23年，期間波音前後換咗8位銷售總監同佢抗衡，但佢地位依然穩如泰山，直至自己諗住要退休歎世界為止。

綜合佢之前喺外國傳媒嘅訪問，原來佢嘅成功，全靠以下呢5大秘訣！嗱，做開Sales或者準備做Sales嘅，真係要背熟佢喇！

1、【sell產品等於sell自己】

萊希認為，作為銷售員，自己就等同產品嘅代表。想成功sell到嘢，首先就要確定自己維持最佳狀態。只有精神飽滿、有感染力嘅人先說服到其他人買你嘅嘢。

2、【瞭解產品】

要充份瞭解產品，先能夠知道產品點樣切合用戶需求，從而說服佢哋購買。如果只係用同一份稿去推銷唔同類型嘅客，成功率肯定大大降低。

3、【見到個客先開始推銷，已經太遲】

喺推銷之前，首先要進行資料搜集，設想不同嘅情況，做好萬全準備。

4、【高科技產品，要用高科技介紹】

推銷手法要配合產品特質，以前空中巴士嘅銷售總監鍾意用投影片配合講解，千遍一律，有乜新意，但萊希就會搞搞新意思。好似空中巴士當年推出全球最大型嘅A380客機，佢就專登搵人設計咗一部A380飛機模擬駕駛器，畀顧客親身體驗架巨無霸飛機。

5、【要當顧客係學生，唔係上帝】

今時今日，未必樣樣嘢都要對個客「say yes」，因為顧客對產品嘅認識始終有限，乜都就晒佢，未必係好事。另外，將顧客當成自己嘅學生，咁學生有咩唔明，老師自然要向佢詳細解釋。咁樣做唔單止可以令顧客信任你，更加令雙方建立一種長期嘅緊密關係。

－－－－－－

《骰寶坊》誠邀各地【賭王】【賭后】挑戰神人境界，每日更有百萬籌碼等你領取！立即免費下載，體驗《骰寶坊》最真實、刺激的多人在線骰寶遊戲！

遊戲下載：

東網Money18「貼市貼士」功能，助你掌握投資先機

on.cc東網