【即市分析】內房股炒風可長嗎？
20181026
東網電視
更多新聞短片
東方產經專欄作家Handsome哥：近期個市光怪陸離，好似昨日唯一升得較有勢頭的板塊--內房股就升得最出奇，此話何解？
首先，抽上主因是市傳內地銀行下調首套房貸利率有關。不過，查實經濟前景轉差加上人民幣走貶的話，資產價格睇跌，投資者唔會因為銀行減房貸利率而去作出置業決定。板塊基本面無好過，資金短炒可能只係因為無板塊可以揀得落手，貪內房股相對具備流通性而已。
其次，市場未來如果又再炒憧憬中央出手撐樓市救經濟，筆者就更加唔睇好，事關中央正面對中美貿戰、人仔貶值同內需谷唔起的難關，故相信只樂見穩樓市而非樓價轉熱之情況出現，加上近期內房股走勢都係「彈散」多，咁仲值唔值得入貨，其實都唔使畫公仔畫出腸！
照咁睇，大市今期亂過亂世佳人，當下入市跟風短炒風險甚高，加上今日係周末前交易日，都係少做少錯為妙。
─ ─ ─ ─ ─ ─
「東網Money18」全新功能「貼市貼士」，助你掌握投資先機
「互聯餘額」數據，助你掌握北水動向