科企深度遊！下次去美國記住呢3個「打卡」景點
20181105
東網電視
更多新聞短片
Apple Park內其中一個焦點「打卡」位Steve Jobs Theater。
科技巨企豪掟錢建總部，鬥獨特，結果近年畀世界各地遊客攻陷，成打卡點。小記現帶團「科企總部深度體驗一日遊」，行程三個景點，即日來回，唔使逼「金巴」，小費隨緣。
●景點一：Apple Park(蘋果園)-美國加州丘珀蒂諾(Cupertino)
呢「幢」Apple Inc.(蘋果公司)總部，嚴格啲講唔叫得做「幢」，事關係飛碟型，面積280萬方呎，「外牆」全部係弧型玻璃，設計出自建築師行Foster + Partners，即係設計香港滙豐總行嗰位Norman Foster。大樓外面仲有見唔到盡頭嘅大片草地、樹林、果園......Sorry，呢啲通通不對外開放。
不過放心，佢哋安排咗個「旅客中心」，個「懸浮」屋頂夠晒閣下打卡有餘，當然仲有大把Apple產品等你買餐飽。
●景點二：Salesforce Tower-美國三藩市
呢幢係三藩市最高嘅摩天大樓，打卡位係最高嗰9層外牆嘅1.1萬顆變色LED燈裝置，出自當代藝術家Jim Campbell。不過幢大樓唔係企業雲計算公司Salesforce嘅，佢哋只係租咗近半樓面來做總部。
佢哋總部，有10呎高玻璃採天然光，每層設有「冥想室」，準備晒枕頭畀員工坐喺地慢慢沉思。個Office最特別之處，係冇飯堂，公司話鼓勵員工落街食Lunch喎！
●景點三：MPK 20-美國加州門洛帕克(Menlo Park)
豪掟4億美元(約31.2億港元)喺22.6萬平方米上只起一幢樓，就係Facebook(Fb)做得出！呢幢MPK 20嘅Fb新總部，由建築師Frank Gehry設計，司徒拔道嗰幢螺旋形嘅傲璇就係出自佢手。
MPK 20外面睇係玻璃同鋼，裏面就七彩，藍色牆、橙色走廊.....講得出嘅顏色都有。屋頂係空中花園，種咗超過400棵樹，仲有半英里步行徑。
Fb講咗話會喺隔籬再擴建多個「Willow Campus」，會有蔬菜店、藥房同社區設施，仲有1,500個住宅單位，直頭一個鎮咁！當中15%住宅會以低於市價出租，益埋公眾，預計四年後落成，到時小記再帶大家去睇樓！
－－－－－－
《骰寶坊》誠邀各地【賭王】【賭后】挑戰神人境界，每日更有百萬籌碼等你領取！立即免費下載，體驗《骰寶坊》最真實、刺激的多人在線骰寶遊戲！
遊戲下載：
想睇更多一、二手樓精彩故事，即click以下連結：
新盤置啱睇
二手置啱Feel