【即市分析】中央救市泥足深陷 股民陪葬?

2018年11月09日 15:15
東網電視
更多新聞短片

東方產經「MARKET INSIGHT」專欄作者古勝:內地傳媒引述中國銀保監會主席郭樹清表示,下一步將從多方面入手,解決好民營企業融資難的問題,初步考慮對民營企業的貸款要實現「一二五」的目標,即在新增的公司類貸款中,大型銀行對民營企業的貸款不低於1/3,中小型銀行不低於2/3,爭取3年以後,銀行業對民營企業的貸款佔新增公司類貸款的比例不低於50%。

呢個消息,對於內銀股,無疑是一個噩耗,皆因銀行打開門口做生意,貸款畀咩企業,借唔借、借幾多、幾多息、結構如何分布,應該因應本身的資本狀況、風險與回報,有其自主權,尤其上市銀行,要向股東負責。可如今官方定出針對民企的貸款比例目標,難道借唔落手的的劣質中小微企業,都要硬性去發放貸款?銀行為咗降低風險,集中火力借給大型民企,一旦呢啲大型民企經營不善倒閉收場,銀行業的貸款風險集中爆發,又係災難性!

呢份憂慮,說明點解內銀股有五、六厘息,都要捱沽。今日五大內銀股股價明顯受壓,現時跌幅介乎2至3%。作為小投資者,最擔心當然係收息唔夠蝕價﹗最終民企出事,銀行又係要以「債轉股」之類的方式,會否變相由國家「埋單」,不得而知,但如此做法,對海外投資者而言,顯然是極不討好!如今中央救市泥足深陷,仲要搵銀行業來做犧牲者,繼續揸內銀股的話,係咪變相被拖去陪葬?

除咗要內銀股放貸畀民企之外,最近消息指內地監管機構還支持公募基金支援民企化解股票質押問題,可見中央為咗要避免股市爆煲,正千方百計動用全社會資源去救市,可大部分民企係咪救得落?太多干預令市場淘汰機制蕩然無存,最終一鑊熟,又由誰來「埋單」?

近年中央多番強調要提升經濟質素,但如今為着眼前的救市行動,政府的措施似乎在反過來拖低經濟質素,減短痛卻換來更多長痛。指望能開放門戶,引外資來填氹的如意算盤打唔打得響,老古唔敢抱太大期望。除非外圍經濟都係差到爆,逼班老外鋌而走險來大炒一轉,否則機會唔大,而即使真係出現,其實最後結果都係得一個,就係「冚包散」!

講到好悲觀,但人在魚缸,有日過日,太遠的別去想太多,畢竟世事如棋局局新,在當前環球政經金融劇變之時,投資者只有做好防風準備,以不變應萬變。
─ ─ ─ ─ ─ ─
「東網Money18」全新功能「貼市貼士」,助你掌握投資先機
http://bit.ly/2sLtGDm

「互聯餘額」數據,助你掌握北水動向
http://money18.on.cc/connect/dqb.html