【即市分析】細價股集體跳水 事緣…

20181115
東網電視
更多新聞短片
東方產經「薦神」專欄作者帥哥:港股玩完過山車,近兩日又開始轉靜,午後二點成交都仲係5字頭,缸邊友真係悶到發慌!
好在今日魚缸都唔係冇焦點,就係上演咗一齣「細價股笨豬跳」,皆因多隻細價股擬似被斬倉,包括天譽置業(00059)、中國海景(01106)、北京燃氣藍天(06828)、中國寶力科技(00164)及劍虹集團(01557),跌幅一度達三至九成,真係嚇死人!
講番呢次細價股小型股災,市場傳聞多多,但都不離有炒作相關細價股的大戶財政出問題而遭券商斬倉。事實上,唔少呢類股仔大股東股權都拿去抵押融資,一旦股價大跌,補唔切倉好容易出事,火燒連環船致類似今日的情況出現。
遇着細價股急跌,有貨當然係有理冇理先沽為敬,事後見冇事買番係另一回事,畢竟保本最重要,最慘係唔捨得走,結果拉埋閘長期停牌,就真係渣到冇得剩!
在下一向唔推介細價股,皆因太多「人為因素」估佢唔到,營運表現同財政狀況又太參差,而且大部分股仔缺乏流通性,有咩負面消息跌係上嚟可以好甘,那何必要冒險,擔驚受怕?至於話股仔股價急跌而未有停牌,可唔可以博反彈,反正抱住炒牛熊證本金有機會隨時變零的心態,賭唔賭大細就閣下自決!
多隻細價股擬似被斬倉
─ ─ ─ ─ ─ ─
「東網Money18」全新功能「貼市貼士」,助你掌握投資先機
「互聯餘額」數據,助你掌握北水動向