孖妹S檔案:6大金融術語 助你行走「缸」湖

2019年01月13日 16:03
東網電視
更多新聞短片

踏入2019年,展望環球經濟,孖妹都唔敢太樂觀,覺得都係會繼續差。不過,究竟會差成點?今年同舊年嘅情況有咩大分別?各國又有咩新對策?就等我哋搜羅多個今年一定要識嘅金融詞彙,睇吓當中有咩啟示。

黃:香港大學專業進修學院中國商學院客席副教授 黃元山
羅:交通銀行香港分行環球金融市場部首席經濟及策略師 羅家聰
林:光銀國際董事總經理兼研究部主管 林樵基

●衰退(Recession):環球經濟難免陷困局

彩兒:你身體健康嗎?

Kitty:梗係健康啦!只要一日未知道自己係咪患上危疾,咁就係健康。判斷經濟健康與否,我覺得用番同一思路都得。若唔清楚導致下一次經濟衰退嘅觸發點,咁就可以當目前經濟係健康嘅。就似2008年金融海嘯以嚟,環球經濟復甦步伐雖然慢到令人失望,但大體都係健康。

彩兒:近期有分析話美國以至全球都有衰退危機。

羅:理論上,國內生產總值(GDP)連續兩季收縮,就可能出現經濟衰退。

Kitty:依家信用息差大幅擴大,大宗商品價格轉軟,美國短債收益率高於長債,呈現倒掛現象。翻查歷史,收益率曲線倒掛預測衰退,通常唔會出錯。所以我都睇淡後市,覺得未來兩年發生衰退可能性比唔發生大得多。

羅:今年環球經濟會衰,但過程會慢。不過股市陰濕,陰啲陰啲跌難搵食,唔可以炒單邊。投資者宜避險,賺息唔賺價。

彩兒:有港元3個月定息存款年利率高達3.8%,即存入10萬元,3個月就穩賺950蚊,唔錯!比盈富基金(02800)股息仲要高。

●滯脹(Stagflation):美恐出現 宜買金避險

Kitty:巴士加價,啲錢唔見使,仲唔係通脹加劇?

彩兒:你幾時夠錢使㗎?其實單純通脹有咩好怕,只要經濟好,大家齊齊加人工,物價貴啲都唔會影響到你嘅生活質素。不過目前最擔心就係聯儲局前主席格林斯潘開口中,美國經濟出現滯脹,即經濟放緩、出現高通脹及高失業率,但物價就繼續升,大家負擔唔到。情況就似美國六、七十年代尾,當時失業率大升,七十年代初消費者價格指數漲11%。

羅:買黃金避險都係一個方法。

黃:目前境況令我諗起1929年美國大蕭條,股市爆破,1933年減息印銀紙,1937年聯儲局加息退市,令市場震盪。1937年嘅環境同依家都有類同,當時都係經濟唔好,提倡保護主義。而目前美國都埋怨新移民及其他國家。兩段時期,民粹主義抬頭,社會動盪。

Kitty:1937年收緊貨幣及財政政策,風險資產價格被打壓,信貸增速放緩,導致經濟衰退,失業率飆至15%。之後一年,美股從高位回落逾一半。

●閃崩(Flash Crash):脫歐倘無協議 英鎊危

彩兒:喺月初,日圓1分鐘內曾勁升3.68%,兌美元高見104.87。市傳因為蘋果公司下調營收展望引發避險情緒升溫,以及唔少大行喺新年休假,交投淡靜,靠人工智能主導操盤,加劇匯市波動。

Kitty:不過,閃崩情況並非新鮮事。2016年10月英鎊閃崩逾6%,市場猜測係錯盤交易導致觸發程式沽盤;或外匯期權到期,包銷商突然需為貨幣大跌對沖。

彩兒:你覺得今年英鎊會唔會再出現閃崩?

林:有可能。若英國發生「無協議脫歐」,英鎊可能會暴跌。

Kitty:依家係咪要進入戒備狀態?

彩兒:話明閃崩,邊會咁易捉到路。

黃:我覺得依家情況相對樂觀,美股仍處高位,香港樓市唔係下跌好多。投資者需要了解市場本質,例如市場波動可以好大,一時亢奮,一時沮喪,另價格未必可以反映所有資訊,所以投資者要資產組合再平衡,以及藉市場波動性尋找投資機遇。

●穩槓桿(Steady Leverage):內地轉換形式利發展

Kitty:中國以往積極去槓桿,即償還債務,防範金融風險。但今年竟然向市場泵錢,鼓勵中小企借錢,真係唔明。

彩兒:你要先認識槓桿率,即負債與股本嘅比率。過分去槓桿,減少負債,導致資本成本上漲,出現市場流動性危機,甚至拋售資產,令資產價格下跌,變相提升負債率,造成惡性循環。所以,依家改為穩槓桿,而非一面倒去槓桿,係較理想。

黃:財政及貨幣政策鬆緊適度,亦顯示中國政策具靈活性。目前去槓桿轉換咗另一個形式,叫做「漂亮的去槓桿化」。對沖基金Bridgewater創辦人達利奧講過,想漂亮的去槓桿化,就要平衡以下四大要素,包括減少債務、緊縮政策、財富轉移及央行印鈔。

Kitty:點樣評估政策成效?

黃:要衡量中國經濟係咪健康發展,就要比較債務增長同GDP增長,最理想係GDP增長唔依賴債務增長,而係由生產力拉動。目前唔見中國有即時債務危機,因中國係內債多,自己借自己錢,外債唔多,故重組債務唔係好大問題。

●定向寬鬆(Directional Easing):年內料與降準齊出擊

林:人行走向寬鬆如同放水,係人行主動讓內地銀行釋放資金到市場,增加市場流動性。而「定向」就意味政策具針對性,向符合資格嘅金融機構進行降準,為中小型企業提供借貸服務。

彩兒:定向寬鬆同降存款準備金率(降準)有分別?

林:降準係其中一個放水方法。降準無期限,容許銀行提供長期借貸,令企業可以更靈活解決財政問題。相反,定向寬鬆有期限,借貸相對冇咁靈活。不過,降準都有弊處,因其政策無針對性,銀行可能唔願意借錢出去。

另外,降準係一個審慎決定,因唔可以輕易掉轉頭增加存準率。對上一次降準效果唔明顯,股市冇點彈升。我預計,今年人行會繼續定向寬鬆及降準,實行雙管齊下,釋放資金。

Kitty:放水放到咩位算足夠?

林:要睇幾個指標,包括上海銀行同業拆息(Shibor)、名義GDP(Nominal GDP)及債市違約情況及債息水平。若Shibor拉高,意味市場需求資金。例如債券到期,公司未能還債,需要再融資。

黃:另一方面,我覺得聯儲局未來加息步伐會減慢。再者,佢唔應該再加息,就算再加,單純因為要提供buffer(緩衝),一旦將來遇上金融危機時可減息,但呢個做法唔可取。

過往聯儲局動作較遲緩,故有機會加過龍,超越市場一般可承受幅度。另我覺得緊縮政策應該係先縮表再加息,但今輪為減低市場對緊縮嘅反應,以及避免喺貿戰陰霾下百上加斤,就無按次序Unwind(退市)。

●信貸周期(Credit Cycle):一旦逆轉 必衝擊經濟

黃:信貸周期係判斷今年全球經濟嘅重要指標。

彩兒:過往美國信貸周期擴張,融資渠道層出不窮。若信貸周期逆轉,債券違約風險增,咁咪弊?

黃:信貸周期逆轉,百物騰貴及欣欣向榮嘅境況不再。
減少開支,會影響香港資金流及資產價格,同時增加市場波動性。但好彩,香港金融體系穩健,相信唔會有太大衝擊。

Kitty:幾時會步入逆轉周期?

黃:唔知㗎。我覺得美國信貸周期接近頂部,但息率仍偏低,縮表縮咗好少,所以唔係好多彈藥去紓緩信貸長周期引致嘅市場大波動。

彩兒:信貸周期與加息周期有咩分別?

羅:聯儲局調升利率,都未必會郁到市場利率。債價主要受市場利率影響。市傳加息周期將近尾聲,若恐慌情緒加劇,短債息都會照挾上。喺2008年10月,倫敦銀行同業拆息(Libor)抽升至逾4.8%,但美國聯邦基金利率僅1.5%。
------
《骰寶坊》誠邀各地【賭王】【賭后】挑戰神人境界,每日更有百萬籌碼等你領取!立即免費下載,體驗《骰寶坊》最真實、刺激的多人在線骰寶遊戲!
遊戲下載:
https://goo.gl/i2t1yj

「致富智庫」領悟理財/職場智慧,一Click改變一世
http://money18.on.cc/wealth