古勝:金股吸引力勝油股

2019年01月14日 00:01
東網電視
更多新聞短片
金價除受惠於美元回軟外,亦可因避險因素而推升。(美聯社圖片)

古勝在東方產經「MARKET INSIGHT」專欄中表示,上周中美貿易談判結束後冇重大消息公布,港股變咗得個悶字。恒指上周五升145點收報26,667點,國指升60點報10,454點,主板成交回落至887億元。

雖然全周計數恒指累升1,041點,但其實即市上升動力唔算大,都係裂口上升為主,而且資金主要都係押注喺騰訊(00700)身上。當然,升市就點都要有「理由」,例如市場話美元轉弱人仔轉強,有利中資股估值提升、中美貿戰談判冇壞消息、中央將推出有利汽車及家電企業之措施等。

古勝則認為,當中較實在的理由,乃是美股在市場預期聯儲局加息速度減慢下連升多日,使投資市場氣氛好轉。美元轉弱,商品市場及外幣自然有氣有力,日圓落到去108水平,美元兌人民幣則跌穿6.80關,紐約期油難得衝穿50美元後,亦唔肯回頭,上到去53美元水平,金價則伺機抽高,周內曾高見1,297美元。

不過,資金主要係「炒預期」,好似金價與油價近期都係升,但睇牌面就前者贏面較大。事關金價除受惠於美元回軟外,亦可因避險因素而推升;相反,環球經濟前景七國咁亂,試問仲有邊個國家可以承受高油價對企業及經濟所帶來的打擊!所以,從中線角度出發,金礦股的值博率比石油股大。

策略上,金價升但都唔係隻隻金礦股買得,好似招金礦業(01818)及紫金礦業(02899)股價走勢就唔多靚仔,前者早前升過一段要回氣,後者則擬增發A股,致股價乏力。反之,半新股山東黃金(01787)股價早前曾高見21.05元,之後略回至20天線約19.4元水平見支持,可先放入觀察名單,若股價能上破及企穩前高位,後市應可再上,失守20天線止賺/止蝕。

內房股受惠人仔回穩,近期氣氛已改善不少。加上數據顯示內地去年12月首套房平均利率近兩年來首次下跌,消息刺激內房股繼續硬淨,中國海外(00688)上周五升3%,華潤置地(01109)升1.9%,萬科企業(02202)升1.4%。

至於二線內房,升幅就更大,富力地產(02777)升4.5%,禹洲地產(01628)抽高6%。不過,考慮到內地經濟前景仍弱,即使樓市反彈,相信資金都係追有規模及質素較佳的內房為主,故只建議逢低吸納中海及潤地兩隻龍頭。

最後講講近日市場熱炒的5G概念,早前「重傷」的手機設備股都借勢反彈,手機孖寶瑞聲科技(02018)及舜宇光學(02382)分別彈5%及2.6%。智能手機前景如何?大家睇睇蘋果公司及三星均已發盈警,近幾個月股價級級落已一葉知秋。既然連賣機都賣得唔好,試問做相關零件的公司又可以有幾好呢?
─ ─ ─ ─ ─ ─
「東網Money18」全新功能「貼市貼士」,助你掌握投資先機
http://bit.ly/2sLtGDm

「互聯餘額」數據,助你掌握北水動向
http://money18.on.cc/connect/dqb.html