內地巨企開工利是 係咁派嘅...

2019年02月12日 20:41
東網電視
更多新聞短片

呢幾日,又係內地巨企派開工利是曬場面嘅大日子。

講到排場之最,莫過於騰訊(00700),主席馬化騰由1999年開始,每年都親手向同事派利是。佢哋往年就將逗利是嘅員工人龍喺公司樓下排成「旺」字,今年換花臣,幾千人輪住排個「福」字,事關今年係第一次喺新總部濱海大廈派,所以寓意「洪福臨門」咁話。

話時話,往年「旺」字就話筆畫直直橫橫易排啫,今年個「福」字係行書,效果?兩句講晒:挑戰自我,迎難而上。

為咗逗呢封開工利是,可以去到幾盡?排頭位嗰位員工,初七晚八點就抵達「戰場」,等咗七粒鐘,終於喺凌晨三點攞到頭籌,注意番,只係頭籌,想真正拎到封利是,仲要等到初八朝,即是足足十幾個鐘!

啲員工亦早有準備,帶埋小摺櫈,有人連豆袋梳化同飛機頸枕都出埋。不過公司亦好識做,安排旗袍姐姐向員工派綠茶、礦泉水同暖包。

排隊兜足三十幾層樓,終於親手接到馬化騰等高層封利是,有幾厚?聽講金額隨機,由20蚊到100蚊都有。除咗現場呢封實體利是,每個員工仲有200蚊人仔微信開工利是同200蚊QQ紅包。

至於聯想集團(00992),主席楊元慶早於初七就帶住高管巡勻北京總部各部門,派嘅利是包括柬埔寨、索馬里等多個國家嘅外幣。咁人仔呢?有,初八派,聽講每封100蚊。

小米(01810)董事長雷軍亦喺北京總部親手派開工利是,聽講係50蚊人仔加肯德基早餐,夠快手仲可以同雷總Selfie添。

不過,新春開工最另類嘅,怕且係團拜會上聽最高領導演講,聽完仲要一齊唱公司歌。邊間?你估吓。貼士:內地超級巨企。
------
《骰寶坊》誠邀各地【賭王】【賭后】挑戰神人境界,每日更有百萬籌碼等你領取!立即免費下載,體驗《骰寶坊》最真實、刺激的多人在線骰寶遊戲!
遊戲下載:
https://goo.gl/i2t1yj

想睇更多一、二手樓精彩故事,即click以下連結:
新盤置啱睇
http://money18.on.cc/newflat/

二手置啱Feel
http://money18.on.cc/usedflat/