財金圈有人偷偷摸摸過情人節 點解?

2019年02月13日 21:03
東網電視
更多新聞短片

就快又到星期四(2月14日)情人節,同大家數吓財金圈「最X情人節」,包括「最驚心動魄」、「最節衣縮食」、「最花心」、「最有味」、「最冰火」,全部都刻骨銘心,記足一世。

【最驚心動魄】
情人節可以有幾驚心動魄?事關要偷偷摸摸,畀人捉到就麻煩。講嘅係信誠證券聯席董事張智威(Alvin)多年前同當時女友過嘅第一個情人節,佢拉埋女友做咗個好大膽嘅行為,就係偷偷潛入一間當日無對外開放嘅教堂。入去做乜?Alvin就係為咗要喺教堂內嘅十字架下,送隻戒指畀女友。

女友好驚被人發現,不過就甜到入心,之後仲笑足一日。Alvin拍拖無耐就「落訂」,許下娶對方番屋企嘅承諾?結局係,呢位陪Alvin一齊去教堂探險嘅女友,之後真係同佢步入教堂,成為佢太太。

【最節衣縮食】
有人當年就為咗情人節,要「最節衣縮食」。講嘅係上海商業銀行執行副總裁兼傳統銀行業務總監陳志偉(Ricky),佢人生之中最難忘嘅,就係同太太一齊過嘅嗰第一個情人節。

當年Ricky同仲係女朋友嘅陳太讀緊大學,學生哥,荷包無乜錢,為咗嗰日同另一伴去食餐好嘅,佢節衣縮食咗足足成個月!究竟食咗啲咩好嘢?Ricky好口密。今時佢已經有兩個好趣致嘅囡囡,佢話今晚會一家人食飯慶祝。

【最花心】
講到情人節「最花心」,怕且都係國農證券董事總經理林家亨,過節必定兩個情人-今世情人(太太)同上世情人(女兒),加埋仔仔一齊喺屋企煮大餐過情人節。小朋友未出世嘅時候,佢兩夫婦經常做空中飛人,最深刻一年喺埃及過情人節,當日仲要喺船上過,不過大餐嘅味道就認真麻麻。佢每年仲必送禮物畀太太,頸鏈手錶通通都送過,今年就準備咗玉觀音吊墜冧太太。咦唔知小情人囡囡有冇份呢可?

【最有味】
買樓投資、裝修收租瓣瓣掂嘅資深物業投資者吳龍飛嘅情人節「最有味」,仲包好味,事關佢炒樓叻外,煎牛扒亦有一手,佢最難忘嘅情人節都係同美食有關嘅,有趟佢為另一半親自下廚,煎靚牛扒、整芝士焗龍蝦,開埋紅酒做晚餐;另一次就去酒店食,小提琴伴奏下,與情人共享燭光晚餐。

【最冰火】
有人就諗住要過一個「最冰火」嘅情人節。長實地產投資董事郭子威話,配合番呢個近年最熱嘅情人節,今年會精心挑選3個雪糕蛋糕,送給太太以及兩個女兒,要熱熱辣辣之下食住冰凍雪糕降溫過節!佢原來早前於內地出席公司周年晚宴時,唔小心喺台上撞傷腳,目前仍在治療當中,所以今年惟有喺屋企溫溫馨馨度過。
------
《骰寶坊》誠邀各地【賭王】【賭后】挑戰神人境界,每日更有百萬籌碼等你領取!立即免費下載,體驗《骰寶坊》最真實、刺激的多人在線骰寶遊戲!
遊戲下載:
https://goo.gl/i2t1yj

想睇更多一、二手樓精彩故事,即click以下連結:
新盤置啱睇
http://money18.on.cc/newflat/

二手置啱Feel
http://money18.on.cc/usedflat/