【股民熱話】醜股當美女?「神」股是如何煉成的

2019年03月13日 07:50
東網電視
更多新聞短片

香港去年正式接受同股不同權公司來港上市,第一隻係內地手機品牌——小米集團(01810),第二隻就係喺內地從事外賣餐飲網的美團點評(03690)。小米將於3月19日公布年度業績,而美團則在周一(11日)打頭陣公布上市後首份成績表。

截至去年底止美團全年虧損1,154億元人民幣(下同),較上年度虧損189億元顯著擴大。消息令其股價周二(12日)急挫11%,收報52.35元,市值2,577億元。咁蝕法,股價仍有雙位數字,到底呢隻「神」股係咩玩法?

睇番份業績,去年度美團做652億元生意,但年內虧損高達1,154億元,主要是因為去年9月上市,令估值大增,因而錄得可轉換可贖回優先股的公允價值變動由上年度的虧損151億元急增至去年度的虧損1,046億元。

小股東可能睇唔明「公允值變動」係乜東東,反正見到公司變相打開門口做生意而每日蝕3億幾銀,好似一路送外賣一路揼錢落海咁,都咪話唔霹靂!一家每股虧損折合約48港元的上市公司,股價仲有半百大元係事實!如此蝕大本的生意,點解都仲有人做?點解其股票仲有人買?仲有人睇好?呢個就係其「神」之所在!

話明係無盈利同股不同權股份,盤生意蝕緊錢係人盡皆知,呢啲都係投資者風險自負。另外,要留意公允值變動唔係會計上的處理,不涉及現金流及業務影響。若撇除可轉換可贖回優先股公允價值變動的特殊項目虧損,其實美團去年經營虧損110億元,上年度經營虧損都有38億元,咁都唔算係完全冇譜,皆因其上市前要花大錢谷數係常識吧!

有大行繼續睇好美團在本地服務消費的長期戰略定位,維持給予「跑贏大市」評級,並將其目標價上調至59港元。所以話,有時睇股票同選美一樣,都係各花入各眼!迎合到潮流,醜股都可以享有「美女」身價!

到底呢隻醜股,耕耘幾年會唔會真的可以修成正果變成港股中的「美女」,就要放長雙眼等着瞧。之不過,眼前的挑戰係,公司於去年9月20日上市,投資者及基石投資者持股的半年禁售期將於下周三(20日)屆滿。繼一份年蝕逾千億元的業績之後,下周公司股價面對解禁沽壓的承接力,將備受考驗!正路冇貨一係開淡倉,一係靠邊站。坐咗蟹貨又點算好?唔打算長期作戰,輸少當贏吧!

東方產經專欄作者 帥哥

美團點評去年虧損1,154億人幣
https://bit.ly/2HrCJnX

─ ─ ─ ─ ─ ─
「東網Money18」全新功能「貼市貼士」,助你掌握投資先機
http://bit.ly/2sLtGDm

「互聯餘額」數據,助你掌握北水動向
http://money18.on.cc/connect/dqb.html