孖妹S檔案:奇趣指數 識炒有好報

2019年03月17日 18:01
東網電視
更多新聞短片

投資講求Timing同眼光,但孖妹身邊有唔少保守嘅股友都拒絕冒險,齋炒追蹤港股嘅盈富基金(02800)就算,聽落似乎少咗啲樂趣,所以今期搵嚟啲得意產品刺激你哋,原來指數公司及銀行等不時推出唔少奇怪得嚟,但又創新搞笑,兼夾貼市賺錢嘅指數,等我哋逐一介紹啦!

謝:香港財務策劃師學會副主席 謝汝康

劉:渣打銀行大中華區高級經濟師 劉健恆

諸:華夏基金香港(ETF)業務主管 諸人進

Kitty:如果要將各項指數歸類,有無好提議?

謝:創新指數可分兩種,包括零售投資者喜愛嘅主題式指數,以及機構投資者喜愛嘅結構式指數。主題式指數涉獵多個範疇嘅股份,包括為人熟悉嘅人工智能(AI)、機械人及網絡安全;再新穎啲,例如大麻、區塊鏈及千禧年代機會等指數都有。

彩兒:大麻唔係毒品嚟嘅咩?若容許大麻股上市,咪即支持佢哋遺害人間?

謝:其實,大麻廣泛應用於醫療處方,具藥用價值。隨住加拿大政府將大麻合法化,單係2018年,就有20隻大麻股於美國上市,因此指數公司增設大麻指數。

Kitty:有隻ETF(交易所買賣基金)叫Horizons Medical Marijuana Life Sciences ETF(美股:HMLSF)於2017年喺多倫多交易所及美國上市,追蹤北美醫用大麻指數,8成嘅成分股為製藥業公司,注重醫療大麻及非娛樂用大麻行業嘅商業策略。基金價格年內大升近60%,表現驚人。

謝:除大麻指數外,區塊鏈指數都幾新潮。2018年初,我哋推出Reality Shares Nasdaq Blockchain Economy Index(RSBLCN),成分股主要研發及應用區塊鏈技術。而Reality Shares Nasdaq NexGen Economy ETF(美股:BLCN)就追蹤該指數。

彩兒:指數成分股包括部分中概股及亞馬遜(美股:AMZN)等,年內表現唔錯。

謝:Reality Shares獨創區塊鏈評分排名系統,以公司嘅區塊鏈業務佔比加權,為RSBLCN篩選股票,讓指數包含真正推動區塊鏈發展嘅公司。

Kitty:有別於以往嘅市值加權,呢個概念幾特別,且BLCN股價年內升約16%,都有說服力。

謝:台灣、韓國及內地ETF發行商對區塊鏈指數都幾有興趣,等當地證監會批埋,就會成事喇!坦白講,理解區塊鏈應用唔易,但無疑區塊鏈對科技新世代有好大貢獻,不容忽視。

彩兒:呢啲指數背後嘅深奧原理,唔係一時三刻能掌握。

謝:我哋都會特登搵科技專家及醫學博士幫手,解答專業難題,如分辨咩係區塊鏈,非人工智能業務;又或者咩係生化股,咩係大麻股。

至於研究人口統計學等題材,例如2016年推出千禧年代機會指數Nasdaq Global Millennial Opportunity Index(NQGMOI),就會從千禧年代嘅消費模式埋手,運用國家人口數據等,揀出相關消費行業。

Kitty:其成分股內有我鍾意嘅公司,例如蘋果公司(美股:AAPL)、Adidas(美股:ADS)等。

Kitty:本地股友最熟悉嘅指數就係恒指。

劉:其實,市場上有各類宏觀經濟指數,但都唔係用嚟做投資決定,而係為投資者、企業及政策決策者提供更全面嘅宏觀經濟資訊。

例如Renminbi Globalisation Index(RGI)係反映人民幣國際化程度嘅指標,佢會統計各離岸市場存款數量、跨境人民幣支付、點心債券發行及外國投資者持有在岸資產總量等因素。該指數喺2015至2016年有倒退,反映喺匯改後,人民幣貶值及中國經濟放緩嘅狀況。

彩兒:透過分析呢個指數,仲有冇咩新發現?

劉:去年下半年開始,貿易戰打得如火如荼,雖然離岸人民幣存款量未有反彈迹象,但從指數多方面分析,得出人民幣國際化進程不但無進一步減慢,離岸人民幣市場活動反而有所復甦。拉動指數嘅因素包括以人民幣結算嘅跨境貿易增加,以及隨着A股入摩(加入成為摩根士丹利指數系列的因子)、內地放寬外資配置A股及債券等規限,北向資金增加。

Kitty:除分析內地市場外,我知你哋有留意環球經濟,喺2011年已推出貨幣狀況指數(MCIs)。

劉:無錯,MCIs二月底嘅報告話,因聯儲局喺2018年加息4次,共加息1厘,以致美元升值及貨幣供應量減少。所以,料加息周期將近尾聲,惟今年下半年仲有加多一兩次息嘅風險。

彩兒:設計咁多樣化嘅指數,需要具備咩環境及條件?

劉:都要市場有需求,客戶有興趣了解,咁靠深入宏觀分析,增加市場透明度。另資料要齊全、易取,且有持續性,指數先至可靠及有參考價值。惟對於個別無經濟周期性嘅事件,運用一次性訪問或普查可能比運用指數分析更為適合。

Kitty:喺指數設計上有冇咩掣肘?

劉:無!都係跟番發表研究報告前慣常嘅嚴謹審批程序,另研究報告需具獨立性,分析中肯,無誤導。

彩兒:睇嚟銀行及指數公司分別設計嘅指數,用途都好唔同。銀行設計嘅指數,教育意味濃,為市場提供更多分析經濟嘅工具。指數公司設計嘅指數則實用性高,會畀基金公司參考,成為設計投資產品嘅基礎,創意度各有千秋。

謝:市場風格不斷轉變,指數嘅結構都要與時並進。我哋設計嘅指數,除咗包含市值加權,仲有特定業務或高息加權等因素。換言之,成分股嘅市值、特定業務規模或分派股息愈高,其佔指數比重就愈大。

謝:此外,我哋發現用技術指標,例如相對強弱指數(RSI)揀股,表現會跑贏恒指,並推翻基本面佳、股份長線才表現好嘅睇法。

Kitty:技術分析或結構式指數,聽落幾有用,但內容較悶,同主題式無得比。

諸:香港ETF市場較細且未算十分成熟,普遍散戶對ETF認知唔多,所以有多少少Gimmick嘅ETF選股策略,暫時都係較適合專業投資者,而非散戶。

諸:有別於香港市場,全球ETF買賣最活躍嘅係美國市場,其ETF成交額高,由此可見,美國投資者買ETF係家常便飯,一般美國人買嘅退休基金或透過獨立金融理財顧問(IFA)買嘅基金都有相關配置。

而因為美國市場胃納大,創新ETF都唔驚無人買,例如「Make America Great Again」ETF(美股:MAGA),其係追蹤支持美國總統特朗普嘅股份表現。

彩兒:侵侵概念嘅ETF!?的確幾搞嘢!

諸:我哋奉行由下以上嘅揀股策略,所以唔建議因某熱炒主題而追入個股,除非係成個被動主題基金,睇長線價值就OK。去年二月,華夏基金(香港)推出華夏MSCI中國A股國際通指數ETF,名為華夏A國際通(03197),就係食住A股入摩勢頭,為環球投資者提供渠道涉足A股市場。而最近,我哋認為今年嘅投資市場會由固定收益主導,所以花較多心思於設計貨幣市場基金上。
------
《骰寶坊》誠邀各地【賭王】【賭后】挑戰神人境界,每日更有百萬籌碼等你領取!立即免費下載,體驗《骰寶坊》最真實、刺激的多人在線骰寶遊戲!
遊戲下載:
https://goo.gl/i2t1yj

想睇更多一、二手樓精彩故事,即click以下連結:
新盤置啱睇
http://money18.on.cc/newflat/

二手置啱Feel
http://money18.on.cc/usedflat/