黃國英:玩上落市會錯失大浪

20190417
東網電視
更多新聞短片
豐盛金融資產管理董事黃國英在東方產經「對沖國度」專欄表示,一日升一日跌,牌面當然是偏好,畢竟標普500指數距離歷史高位只差一步,連高盛(GS)業績後回落也動搖不了氣氛。不過,迎戰的最好策略,還是精選一些心水股份,控制住組合槓桿,全力炒股不炒市便算。自己參與的幾個市場,根本就是榮辱互見,牛熊並存,要推敲指數的方向,其實並不容易。
對比美股準備破頂的氣勢,恒指是有不如,有些機會轉向成短線上落市。自己從來對炒上落市興趣不大,回報低又精神緊張。就當恒指是29,700至30,300點之間反覆,如果要玩高沽低揸,每次可能賺二三百點,執行上還要是接近完美才做得到,因為高低位很大機會一瞬即逝,要睇到實,又怕隨時破位一棍飛到無雷公咁遠,止蝕不及就贏埋唔夠輸。
何況玩上落市的心態,會成為錯失大浪的主因。無謂針對25,500點睇淡的一班,去到27,000點左右的時候,不少人就算不以為氣數將盡,至少也在博轉為上落市,結果就一直升到唔信。博中大趨勢順勢而行,才是賺錢的黃金時間。
上落市期間可以細注落park,保持觸覺等突破,但最好不要高沽低揸,只應該做心水的一邊,睇好就買,睇淡就沽,又沽又買只會精神分裂,失去信念,到趨勢出現時就無法把握。
自己有偶然做淡,不過對比手上的持倉,淡倉數目是遠遠不及,純粹是貪方便做對沖減低風險。一般投資者沒有一個核心持倉的話,其實簡簡單單博單邊便可以。
豐盛金融資產管理董事 黃國英(作者為註冊持牌人士)
(本欄每周逢一、三、五刊出)
─ ─ ─ ─ ─ ─
「東網Money18」全新功能「貼市貼士」,助你掌握投資先機
「互聯餘額」數據,助你掌握北水動向