孖妹S檔案︰唔靠「父幹」點賺首桶金?4位財俊咁講...

2019年07月14日 19:44
東網電視
更多新聞短片

香港人出名夠博夠食腦,所以過去誕生好多個百萬及千萬富翁。唔問都唔知,孖妹嘅朋友圈內都有唔少成功例子。佢哋仲要係年紀輕輕,無靠「父幹」,靠自己嘅雙手賺人生第一桶金。所以,孖妹今次打醒十二分精神,虛心向四位80後、90後學習創富秘訣!

Kitty:假設一個打工仔每月儲1萬元,都要8年多嘅時間先儲夠100萬元。

彩兒:喺AI年代,能唔能夠保住飯碗都唔知。所以,依家仲唔加把勁賺多啲,將來後悔莫及。

【炒股入門 中六賺夠百萬】
劉:名錶交易平台18Watch創辦人劉勝鈞(Harvey)

劉:我中一開始炒股,當時市道好,真係買咩都賺,覺得自己係少年股神。而為咗Keep住自己嘅成績,就睇好多書,鑽研宏觀經濟、歷史及政治,期望能夠以古鑑今,提升分析能力,其後8年,每年股票平均回報都有20至30%。到中六時已經賺夠100萬元,當中大部分盈利來自股票,小部分來自比特幣(Bitcoin)及做生意。

Kitty:我知道你近年專注搞生意,但做生意風險高,唔怕一鋪清袋咩?

●創業無懼失敗 當考眼光
劉:唔怕。年輕人輸得起。如果輸晒啲錢,就可以靠自己之前累積嘅知識同人脈賺番嚟,所以點都唔會餓親。再者,喺創業路上,就要預咗經歷失敗,但從失敗中必定學到嘢,就當鍛煉眼光同膽識,相信憑着鍥而不捨嘅精神,最終會成功。我做過好多唔同生意,包括喺美國採購廢棄伺服器,然後一櫃櫃運返香港轉售,都有逾15%回報。另外,又有喺內地開廠做塑膠原料生意;最近更整咗個名錶交易平台。

Kitty:咁你唔再炒股喇?
劉:每個人都要知道自己嘅置富優勢,搵到適合自己嘅戰場賺錢。我就負責對外,搞生意賺錢。但目前我同拍檔都唔睇好股市,所以無揸任何股票。

另外,我對香港經濟悲觀,因香港依賴傳統行業,無新經濟動力,受中美貿易戰等政治因素影響,嚇退投資者。此外,香港樓市泡沫大,租金回報率過低,港人收入追唔上樓價升幅。一旦樓市下跌,銀行面對流動性風險,就會出現連鎖效應,影響埋向銀行借貸嘅實業家,令實體經濟轉弱。

------
【外匯加Bitcoin 資產倍數升】
KK:投資者馬光健(KK)

彩兒:「香港千萬富翁調查報告2018」指,香港共有51.1萬名持有1,000萬元或以上資產嘅千萬富翁。KK,你好快成為執業醫生,晉升為千萬富翁指日可待。

KK:想成為百萬或千萬富翁,你要先問自己,點解賺唔到呢個數?收入來源除咗係份人工,大家仲可以尋找其他被動收入及投資收入等。我用絕大部分時間研究Trading,就係要尋找值得投資嘅資產。過去,我投資外匯,令資產由幾萬元漲至幾十萬元;再靠投資比特幣,令資產喺一年之內翻幾倍,由幾十萬元漲至百萬元。

Kitty:炒股唔係安全過炒虛擬貨幣咩?Bitcoin價格波幅好大。

●睇淡美股 明年料轉熊
KK:股票市場已經好成熟,風險溢價被擠壓到好少;相反比特幣市場仲未成熟,價格仲有好多上升空間,所以我之前將10萬美元All-in Bitcoin。我哋唔認同比特幣嘅設計理念,但就覺得其價格走勢有利可圖。無疑,Bitcoin價格走勢好波動,但以前大宗商品價格都係咁。

彩兒:美國聯儲局主席鮑威爾暗示月底減息,對股市唔係一個天大好消息咩?

KK:美股高處不勝寒,聯儲局減息,反映美國經濟疲弱。量化寬鬆政策對提振股市成效存疑,我覺得後市唔樂觀,唔排除2020年美股會轉熊。

------
【狂搵副業 促成商品大刁】
曾:投資者曾卓耀(Stephen)

曾:好多人靠打份工賺取穩定收入,但我就唔想成世打工,所以我搵咗其他副業賺錢。2018年4月,我賺到人生第一個100萬元,人工及股票各佔逾35萬元,一單Deal賺25萬元,其餘來自生意收入。

由大學畢業開始,我就投資股票及牛證,半年內就將20萬元本金翻至35萬元。而我又接過一單大Deal,撮合過買賣雙方,做成一單大宗商品交易,賺到25萬元中介費。

●開小食店 做果酒代理
另外,我又有做啲小生意賺錢,例如同個泰國朋友合資十幾萬元,喺香港開小食店,平均每月賺8,000元。另有朋友攞咗某隻果酒嘅香港銷售代理權,我就會推介其他朋友買,每次賺番2,000至3,000元差價。不過呢啲小生意點賺,都唔及做成一單大Deal咁和味。
Kitty:原來有人脈真係可以轉化成收入!

●廣建人脈 冀自立門戶
曾:但呢啲Deal可遇不可求,依家惟有不斷自我增值及儲人脈,希望有朝一日可以自立門戶,搵到源源不絕嘅生意。我希望可晉升至某上市公司嘅管理層,屆時薪酬待遇都會相對優厚。而喺實現呢個夢想前,我都係努力打多8至10年工,儲多幾把「鎖匙」,為未來打開多道創富大門做好準備。

Kitty:你打算點樣好好運用嗰100萬元?

曾:坦白講,我嘅投資風險承受能力較低,且今年都打算向女友求婚,預計會用60萬元,所以只會投資高流動性資產,即用30萬元買股票,其餘揸現金。

彩兒:你咁有眼光,結婚必定係一個最好投資。

------
【長輩打本 攻穩健收息股】
洪:中國通海證券投資組合經理洪龍荃(Larry)

洪:我做咗嘢兩至三年後,喺2013至2014年期間,就儲到人生第一桶金,主要係靠股票賺番嚟。讀中六時,爺爺同嫲嫲畀咗30萬元我投資股票,我成功賺咗少少錢。而做金融呢行,人工高啲,仲有豐厚嘅花紅,都有幫助儲股本,再將錢滾大。

Kitty:我都努力做咗幾年嘢……
洪:揀啱股票係王道,睇恒指會覺得世界無希望。我比較鍾意買啲大間得嚟又有穩定派息嘅股票,例如香港中華煤氣(00003)及港鐵公司(00066)。買港鐵更可以對沖番自己嘅交通費。我亦睇好同民生衣食住行有關嘅股票,例如HYPEBEAST(00150)。佢經營一個買靚衫、波鞋嘅網上購物平台,而我自己都有用呢個平台買波鞋。不過呢類股份,就未必可以用股神巴菲特嘅Buy and Hold投資方式,要時刻追蹤佢嘅業績表現,檢視投資價值。

我亦鍾意澳優(01717),自從2017年公布將奶粉品牌整合,汰弱留強,澳優嘅羊奶粉跑出,所以我都有幫客人買入作長線投資,不計股息,單計股價升幅累賺130%。

彩兒:每年投資組合目標回報係幾多?

洪:無論係自己或客人嘅投資組合,穩健收息股及具潛力增長股各佔一半,而每年目標回報則定10%以上。而每隻股票佔比都少於一成,新買嘅股票更只會有少於2%嘅資本投資。我覺得今年股市大升機會微,預計恒指會徘徊26,000至30,000點之間,所以我會吼低位入市,同埋揀啲唔係好受大市影響嘅股票,希望可以喺牛皮市賺錢,睇好啤酒、奶粉及服裝等消費股。

Kitty:好多香港富豪都靠買樓賺錢,你自己有無投資物業?

洪:今年年頭,我用咗超過100萬元首期買入鴨脷洲海怡半島一個單位送畀媽媽,當中四分之一嘅資金都係來自股票盈利。預期香港樓宇供應喺未來兩三年都會好少,三房或以上嘅大單位價格升幅較細單位大。而且黃竹坑及駕駛學院附近地皮將推售樓花,有望帶旺附近一帶物業升值。

●嚴守紀律 儲一半人工
Kitty:擁有100萬元之後錢搵錢係咪會易啲?
洪:咁又未必。錢搵錢,好需要「腦」力;0蚊賺到100萬元,需要「勞」力。好彩我同太太一直都好有計劃同紀律,唔會過度消費,每月都可以儲起一半人工,所以都唔使捱麵包去賺取第一桶金。加上,對我嚟講,錢都係副產品,係做好一件事而衍生出嚟。我個人冇咩物欲,又冇咩追求,只希望一家人生活安定。所以一直冇訂財富目標。

彩兒:同意,內心富足先最快樂。

------
立即參加「賞您睇」:http://bit.ly/2JWKULh
Click下面粒掣,儲on.cc coins!機票、家電、超市禮券、過萬份獎品等緊你。

東網Money18「貼市貼士」功能,助你掌握投資先機
http://bit.ly/2sLtGDm