m18講場:小米開旗艦店 除咗夠大仲特別在...

20190717
東網電視
更多新聞短片
小米集團(01810)董事長雷軍一直標榜集團唔係硬件製造商,而係一家互聯網生態公司,近年仲好熱衷開實體店,喺2017年曾經豪言3年內小米之家店舖數量要增至1,000間。日前集團喺西安開設咗全國第5間旗艦店,「米粉」會否好奇,普通小米之家同旗艦店有咩唔同呢?
同一般只有100至200平方米嘅分店唔同,旗艦店面積當然夠大,普遍超過500平方米,有更多空間擺放產品供顧客體驗,展示產品種類達400至500款。
近年集團大力發展物聯網產品業務,所以旗艦店亦有出售更多智能家居產品。要知道,小米幾乎所有智能家居產品都可以用語音聯網操作,所以行入旗艦店,「米粉」就可以用電視控制吸塵機、或者叫個喇叭開燈,試下集團一直sell嘅「萬物互聯」。
作為華南地區最大門店,深圳小米旗艦店面積約650平方米,係小米全國第一間開業嘅旗艦店,亦係唯一一間設有互動購物牆。該店店長劉偉話,旗艦店服務範圍較廣,佛山及東莞店甚至有唔少香港嘅客人都會過來,周末日均客流可以高達6,000人,閒日亦有逾2,000人次,所以特別整幾個屏幕畀客人自助購物。
線上商城同門店標價一樣,咁客人又點解要山長水遠去分店購物呢?佢就解釋,門店同線上商城有相互導流作用,例如早前集團進軍大型家電市場,推出冷氣機、洗衣機等,有唔少客人都會先去店內試用下再考慮買唔買。除此之外,旗艦店仲會間中舉辦活動,又設有小米金句牆畀鍾意影相嘅「米粉」打卡,都算係一個朝聖地吧。
------
立即參加「賞您睇」:http://bit.ly/2JWKULh
Click下面粒掣,儲on.cc coins!機票、家電、超市禮券、過萬份獎品等緊你。
東網Money18「貼市貼士」功能,助你掌握投資先機