古勝:滙控除淨前買入值博嗎?

2019年08月14日 00:08
東網電視
更多新聞短片

港股浸浸落,恒指已進入嚴重超賣區,但仲未見得有大彈條件,皆因見到重磅藍籌板塊沽壓未止,銀行股尤其係重災區,滙豐控股(00005)、恒生銀行(00011)、中銀香港(02388)幅走勢圖都係一路向下碌,一則在反映經濟基調轉差,二則亦反映大戶在積極減持港股,就連一向被視為資產最優質的大藍籌都要沽,咁你話港股後市仲有冇運行?

香港資產價格危如累卵,投資者最簡單直接的自保方法,係揸現金,買黃金。見到近期各大央行都在囤積黃金,呢類超級「大戶」的取態如是,不妨作為參考。睇番恒指幅月線圖,嚟緊呢一波調整,可能維持逾年,恒指見有機會落番21,000點水平。應該點部署,各位唔好做鴕鳥,盡快做好風險管理,以策萬全。

滙控派發第2期中期息每股10美仙,將於明日(15日)除淨,要食息今日是最後買入機會。受到高層離任消息的拖累,加上股市大氣候利淡,分屬重磅的滙控股價由7月中旬的65元水平,反覆至近日低見57元水平,累跌幅度12%。

理論上,呢一浪落到55元,可能會有技術性反彈,上方反彈重要阻力位喺60元關。現水平計及除淨,老實講呢啲位買落去見唔得值博,買賣衍生工具的更要注意除淨因素。

事實上,目前全球經濟形勢嚴峻,貿易戰加埋貨幣戰,太多重大不明朗因素。實體經濟既已確認轉差,對銀行業有三個潛在影響,一乃貸款需求下降,二乃資產質素下滑,三乃呆壞帳風險上升。這三個因素持續發酵的話,將反映在銀行的盈利和派息。故眼前銀行板塊所出現重沽潮,並非偶然。收息一族,唔好再坐定粒六,為維持未來兩年的固定收入穩定及早籌謀!

至於同屬主要資產範疇的港樓,同股市都喺半斤八両,迎面而來有兩大挑戰,其一乃內地資金沽貨班水北上,其二是港企年關難過沽物業套現救亡。老古都冇水晶球,唔知自己係咪太過悲觀,只係知道當客觀上負面因素不斷浮現,懂得居安思危,思則有備,有備無患,十分重要。

東方產經專欄作者 古勝
------
立即參加「賞您睇」:http://bit.ly/2JWKULh
Click下面粒掣,儲on.cc coins!機票、家電、超市禮券、過萬份獎品等緊你。