古勝:睇實車股成交 伺機短炒

2019年12月03日 00:43
東網電視
更多新聞短片
港股魚缸悶局一場,周一全日成交僅670億元,阿里巴巴(09988)上市又如何,一潭死水依然故我。點解會咁?香港經濟差,港企缺乏投資價值;中美貿易談判膠着,資金對中資股亦抱觀望態度,結果就係大家都企晒喺度,冇咩好做,或者提早收爐,冇眼屎乾淨盲!
講到收爐,尋日卜架行幾個股友都大叫救命,皆因買咗某航空公司機票準備提早收爐外遊,點知如今間航空公司唔知仲捱唔捱到下個禮拜,搞到要以高一倍價值買其他航空公司補飛。老實講,呢家航空公司有問題,唔係新聞,但用家都要幫趁,一來係貪平,而且部分航線時間比其他航空公司要好,其次就係博佢死唔去,點知依家就好似買咗問題股仔咁,真係可能要無期停牌甚至除牌,變相要撇帳。雖然話,一張機票,貴極都有個譜,但都足以掃興,補唔切飛,隨時要留港困獸鬥就仲冇癮!
仍留喺場的資金,仍然留喺幾個中資板塊玩對對碰。上個禮拜醫藥股玩落閘放狗,今個星期就到內房股接力炒上,見華潤置地(01109)、碧桂園(02007)及中國海外(00688)升幅介乎2至4%、中國恒大(03333)及融創中國(01918)同升6%。汽車股都好似想試水溫,吉利汽車(00175)、廣汽集團(02238)及華晨中國(01114)升1至2%,反正冇炒一排,不妨睇實成交,睇冇有得短炒一轉。
香港公布10月份零售貨值數據,按年跌24%,乃有紀錄以來最大跌幅。數據差早喺預期之內,相關股份跌幅亦已一定程度作反應。反而見到化妝品零售股莎莎國際(00178)宣布終止新加坡業務,以集中資源拓展港澳、內地及馬來西亞市場,顯見公司積極重組集團業務。因應舖市調整,以及上半年社會動盪反有助推動電子商貿,估計公司會繼續着手重整香港業務。其實,投資者宜以平常心看待每個行業的周期,更重要係觀察企業應對淡風的積極性,自可發掘新周期的明日之星。
東方產經專欄作者 古勝
------
【仲等咩?】最強炒股神器《東網Money18》APP已全面升級,新增多項新功能,助你投資理財、揀股問股!即刻click入 http://on.cc/redirect/money18 下載安裝!