【股民熱話】港股久守必失?12月睇升定跌?

20191203
東網電視
更多新聞短片
眨眼又到了2019年最後一個月,恒指現水平相比起去年底收市價25,846點,仍有低單位數字升幅進帳。可其實港股喺1,000點波幅已近一個月,到底呢個12月,可唔可以打破悶局?
首先,當然都係要睇中美貿易談判有冇成果。若然又係煲冇米粥收場,有心理準備美國會再向進口中國商品加徵關稅,而中國亦會將報復行動升級。故雖然眼前中國最新公布的官方及財新製造業PMI數據都重返盛衰分界線之上,但好可能係「死貓彈」,即最後逃生機會,大家要做好兩手準備。
若然中美雙方能簽署首階段貿易協議,相信條款之一是美國全面取消向中國所徵收的關稅,如此理論上中國製造業的壓力有望得到紓緩,但股民要搞清楚,咁並唔等於中國經濟可望迎來復甦,皆因外資撤廠了,不會立即就重來。更何況美國若作此決定,中國必須要付更大代價,未來內地各重點產業包括金融、製造包括汽車以及科技業,中國企業所面對的外來競爭想必會大增,對中企盈利和整體經濟所造成的中短期衝擊,實在不容低估。
當然,香港政經局面的變化,亦難以估量。之不過,過去半年的事實說明,內地資金積極護航之下,港股表現基本上與本地政經局面脫節了。除非內地股市冧棚,否則單純以香港因素,不足以令港股作出突破。
再看阿里巴巴(09988)上市後,基本上今年香港新股市場經已可以當成收爐了,見到近日大市成交淡靜,足見年底長假效應正逐步浮現。市況既缺乏向上的動力,向下承接自然會受到考驗。以恒指今年4月高位與8月低位計,再以黃金比率計算,得出恒指若確認失守26,100至26,200點水平,向下一個較大的支持位睇到落25,000點關,而向上的重大阻力則在27,500點水平,各位不妨作為波幅參考。
板塊方面,最好仲係遠離周期性股份,尤其是銀行股。醫藥股上周開始調整,冇貨可以靜心留意今個月分注低吸的機會。以藍籌股石藥集團(01093)為例,股價回落至16元邊,可以考慮分注翻兜,畢竟其競爭優勢未有大變化,消化政策消息過後,料股價可再展升勢,中長期可望繼續跑贏大市。
另一個可以留意的板塊乃內房股,皆因農曆年前,料內地會積極保持市場流動性充裕以協助企業應付年關,內房企業的平平穩穩過年關,關係到金融系統穩定性,故在政策加持下,值得關注。惟須避開二、三線內房股,側重有國企股東背景的大型內房股,勝在進可攻退可守,例如華潤置地(01109)及中國海外(00688),策略以逢回吐收集炒波幅,忌高追。
東方產經專欄作者 帥哥
------
【仲等咩?】最強炒股神器《東網Money18》APP已全面升級,新增多項新功能,助你投資理財、揀股問股!即刻clic入 http://on.cc/redirect/money18 下載安裝!
想問股票?即刻Click入 http://bit.ly/2NqHU90 留言,《東網Money18》專欄作者同你點選作答。