【專家點評】古勝:收租股未跌完宜暫避

20200116
東網電視
更多新聞短片
收租股恐反覆尋底。
港股觸及29,000關後持續回吐,阿里巴巴(09988)周三(15日)跌逾1%、騰訊控股(00700)在400元邊載浮載沉,反而美團點評(03690)股價逆市靠穩。周二老古話金山軟件(03888)短線目標睇25元,果然周三股價一度高見24.25元,升幅逾一成;同日話中芯國際(00981)短線有勢衝15元關,昨日曾高見14.5元,兩隻股份走勢都算對辦。
好多股友問老古,到底新經濟股升完未,有貨係咪要走。老古再次重申,阿里貨底要長坐,騰訊只宜短炒波幅,美團若有貨可繼續坐順風車,但若無貨,畢竟現價已不便宜且銀碼大,只宜待調整技術指標現超賣才小注一試,其他的就打游擊,短線為主。反正資金仍留喺新經濟股炒作,唔使有咩大智慧,跟住個勢炒,嚴守止蝕紀律就係。
新股九毛九(09922)首日掛牌,股價升穿10元關,較招股價升逾五成。老實講,以一家中餐廳品牌管理及營運者而言,目前估值甚高,一道「酸菜魚」招牌菜係咪真係仲有好大憧憬空間,老古心裏不無疑問。既然過唔到自己嗰關,亦自然唔會叫大家入市高追。
幾大本地發展商都陸續宣布借地或捐地畀政府興建過渡性房屋,唯獨矮仔陳揚言集團冇農地,冇得捐地畀政府起樓,可謂貫徹其「獨來獨往」的作風。查實上市發展商借地又好,捐地又好,都算係拿小股東的利益去做「善事」。不過班發展商向來無寶不落,唔會做蝕大底的事。到底只係形式上的表態買個政治正確的保險,抑或只係做個順水人情,實際目的其實係為盤活手頭農地價值向政府拋出橄欖枝,即小財唔出大財唔入,就要放長雙眼等着瞧。
至於話地產股可唔可以追落後,當然要睇個市會否抽上去衝三萬關。若首季兩地股市仲係有得上,地產股確實係有炒落後誘因。相反,若首季始終未能突破兩萬九,相信啲錢都係繼續集中喺新經濟股,地產股充其量係靠穩,唔會有太突出表現,收租股更有機會反覆尋底,皆因農曆新年後物業租賃市場將迎來又一次低潮,故別心急撈貨。
------
【仲等咩?】最強炒股神器《東網Money18》APP已全面升級,新增多項新功能,助你投資理財、揀股問股!即刻click入 http://on.cc/redirect/money18 下載安裝!
想問股票?即刻Click入 http://bit.ly/2NqHU90 留言,《東網Money18》專欄作者同你點選作答。