滙豐總行職員餐廳重新開幕　轉型「舊香港情懷」

經過幾個月翻新工程，滙豐總行大廈地庫嘅職員餐廳，已經喺今個月重新開幕喇，轉咗行舊香港情懷，仲新加咗「一姐」香港區行政總裁施穎茵(Diana)好鍾意食嘅雞蛋仔添。不過咁，員工餐廳的確係靚咗、醒神咗，但弊在有員工同小記講，唔少同事都覺得張櫈太硬，坐得唔舒服囉。

大排檔好常用嘅大圓桌、仿照茶餐廳嘅復古瓷磚地板、用路牌做裝飾嘅特色牆，估唔到全部都可以係滙豐嘅職員餐廳搵到。唔單止呀，仲有模仿巴士站嘅售票機、香港街景壁畫、霓虹光管添，成個舊香港嘅面貌出晒嚟。

食物方面，往時燒味、中式湯水、家常菜繼續喺度，仲有其他港式新力軍加入，包括茶葉蛋、豬皮豬紅湯麵、油條等。而滙豐作為一家國際銀行，餐廳食物都好多元，仲有印度咖喱、韓式年糕、墨西哥卷。亞太區行政總裁王冬勝(Peter)就話，自己好鍾意餐廳啲絲襪奶茶喇。

喺中環嚟講，餐廳食物嘅價錢都算幾大眾化，仲計劃喺短期內引入自家品牌PayMe for Business手機付款，的確喺方便好多嘅。