【專家點評】古勝：中國鐵塔跌至咩位先值博？

尋日(16日)港股貼近全日低位收市，全日跌2%報24,970點，成交額近2,000億元。老古早幾日叫大家小心地緣政治及內地強調「健康牛」的風險，但本周二及周三於25,300點均見支持，仲以為港股已經搵到短期底，點知都係計劃趕不上變化。受市場憂慮中美關係惡化以及A股大調整影響，恒指一下子打穿埋25,000點關口，有聽老古講控制注碼的缸邊友，依家就算坐艇都唔會太傷；有執行止蝕，更可以保留實力。

至於後市會唔會下試50天線24,500點？老古都冇水晶球，話晒由近日高位已回調逾1,800點，隨時有機會作出反彈，因此只能見步行步。不過，老古有兩個建議，對於進取想撈底的人，可以考慮喺24,800點落第一注。至於保守者，梗係寧買當頭起，等大市企穩10天線再考慮，雖然到時可能會買貴，但買得相對安心。

個股方面，唔少人仍然想撈焦點股中國鐵塔(00788)！不過，該股近日受制美國制裁華為的陰霾，股價走弱。大行野村報告指，5G發展尚處於早期階段，內地電信商今年希望增加68萬個5G基站，料中國鐵塔可從中受惠，維持其「買入」評級，目標價睇2.15元。

再睇走勢，老古上月提過大家，買中國鐵塔唔使心急。皆因該股由去年底起營造大型頭肩頂向下，上月中一度跌穿頸線1.5元，於6月底低見1.37元；鐵塔尋日跌逾2%收報1.44元，若跌穿埋上次低位1.37元，真係好大機會回試1.2元水平，屆時再博反彈都未遲。

東網財經專欄作者 古勝

－－－－－

Sakura Global專營海外房地產，大量海外一手項目及租務管理、海外升學和多國移民服務、一對一服務！

請即致電：5133 0626

https://wa.me/85251330626

【仲等咩？】最強炒股神器《東網Money18》APP已全面升級，新增多項新功能，助你投資理財、揀股問股！即刻click入 http://on.cc/redirect/money18 下載安裝！