致富智庫:孩子未來取決父母 有冇呢11個叻人共通點?

2020年11月21日 12:00
東網電視
更多新聞短片
(Getty Images圖片)
外國機構同知名大學做咗好多調查,綜合不同範疇有傑出成就的「叻人」,他們的父母在自身條件、管教仔女方法等,會有11個共通點。所以話,如果你作為父母,想仔女他日成功,或者至少在社會可自食其力,不靠「父母幹」就能有不俗發展,但又不想自己不知不覺做了「怪獸家長」的話,就要偷師嘞!
●嗱,問問自己有冇以下呢11點:
【1、畀仔女做家務】
哈佛大學研究話,如果仔女唔識洗碗,培養唔到獨立處事能力。家長們應該畀仔女「捱苦」,簡單嘅倒垃圾、洗衫,留畀佢哋做啦!
【2、教社交技巧】
賓夕凡尼亞州州立大學有份追蹤美國超過700個細路,睇住佢哋由幼稚園至25歲嘅成長歷程,發現有良好社交技巧嘅細路比較容易攞到大學學位同搵到Full-Time Job(全職工作);冇又點?大件事囉,大個咗好大機會犯案、酗酒、無所事事靠救濟。
【3、期望「高啲啲」】
加州大學分析咗6,600個喺2001年出生BB嘅資料,發現父母期望愈高,仔女愈有成就,但最緊要又唔好over晒,對子女作無謂嘅幻想。
【4、兩公婆關係好】
唔講都知父母成日「嘈交」會影響仔女成長,離婚嘅話,會好大程度影響仔女對事物嘅判斷。
【5、學歷高】
有研究追蹤咗超過14,000名由1998年至2007年入讀幼稚園嘅細路,發現阿媽18歲或以下,即係阿媽本身都未讀完高中,仔女大個讀到高中或大學嘅機會都低啲。有研究仲直頭話,細路8歲嗰陣,單憑父母當時嘅教育程度,就可以預測到呢個人40年後嘅教育水平同工作成就有幾「勁」!
【6、從細教數學】
愈早掌握數學愈着數,因為數學愈叻,對閱讀愈有幫助。
【7、建立良好親子關係】
父母有錢,贏喺起跑線上當然好,但調查話嚟自貧困家庭嘅細路,只要喺0至3歲得到父母悉心照顧,細個讀書都會叻啲。
【8、唔好搞到有「強迫症」咁】
千祈唔好以為陪得仔女時間愈多,仔女會愈叻、愈乖、愈覺得幸福;尤其係阿媽自己都忙到死嘅時候,仲想辦法搵時間陪仔女,呢種壓力其實會好似傷風咁傳染畀仔女。
【9、強調後天努力】
要灌輸類似「人定勝天」嘅概念,即係話仔女測驗高分,千祈唔好讚係「天生嘅」,因為咁樣等如同仔女講「後天做咩都冇用!」。
【10、阿媽出嚟做嘢】
屋企有女嘅一定要知!哈佛大學商學院研究發現,阿媽外出工作嘅細路女,大個咗比同齡女仔更有機會成為管理層,仲會賺多23%嘅錢!點解?畀阿媽薰陶囉!
【11、社會經濟地位高啲】
貧窮唔多唔少限制細路嘅潛能,史丹福大學研究2001出年生嘅BB,發現高收入與低收入家庭嘅細路,佢哋嘅成就差距,愈嚟愈大,差距比起25年前大咗30至40%。(所以呢,父母都要爭氣)
●以上11項,你有齊幾多先?睇完再畀埋啲國際猛人父母培育仔女嘅心得你睇,咁就唔好話啲研究「得個講字」喇!
好似美國股神巴菲特咁,佢有3個仔女,而家都已經60幾歲。想當年,股神又點樣傳授自己嘅投資心得畀自己嘅仔女?巴菲特覺得,小朋友8到10歲就要知金融係點運作,要點樣係商場上打關係。佢話,呢啲技能係會畢生受用,不但對佢哋將來嘅生意有幫助,而且個人嘅快樂指數會高啲,建立美滿家庭又會易啲咁話!
咁點樣幫仔女鋪路係最好呢?微軟創辦人、全球首富蓋茨嘅爹哋、媽咪就好聰明,佢留畀蓋茨嘅,就係自己嘅「社交網絡」。話說年輕蓋茨創立公司嗰陣,佢爹哋、媽咪幫佢搵咗相熟嘅資深老前輩入公司做。有叔叔伯伯「照住」,當然比其他人更易成功喇!
另外,全球最大社交平台Facebook行政總裁朱克伯格話最重要是要畀仔女一個健康嘅童年,咁樣仔女未來先至能夠發揮全部嘅潛力喎。
--------------------------
「想轉危為機?」本地經濟有望於疫後谷底反彈,應盡早謀劃融資渠道,為拓展業務增添籌碼。
《香港信貸》扎根香港廿三年,上市公司,專業可靠。
一個電話,滿足您資金需要。
.物業一按二按
.公居屋貸款
.中小企貸款
.業主私人貸款
查詢:2525 3535
忠告:借錢梗要還,咪俾錢中介
放債人牌照號碼 : 香港信貸財務有限公司1065/2020;香港信貸(私人貸款)有限公司0336/2020