滙豐慈善基金成立40周年 前主席艾爾敦竟然講呢啲...

20210210
東網電視
更多新聞短片
艾爾敦
滙豐銀行慈善基金成立40周年,好耐冇露面嘅滙豐前主席艾爾敦(David Eldon),都有出席儀式,仲同大家話說當年,講返當年與「滙豐學人」,即喺有份拎到滙豐獎學金嘅大學生一齊茶敍嘅趣事,話舊時啲大學生見到佢好鬼緊張,自己唯有主動出撃撩人傾計,等大家放鬆啲喎!
艾爾敦喺1999至2005年期間做滙豐主席,同時兼任滙豐銀行慈善基金主席,當時拎到獎學金嘅大學生就有見大場面嘅機會,可以去到滙豐總行大廈同一班高層見面、傾下計。艾爾敦話,啲學生哥個個都悉心打扮,仲着晒「老西」,但見到佢呢個主席就有啲驚青喇,佢就主動打開話題匣子同大家齊齊互動。
趁住慈善基金40周年,滙豐將會捐出1.4億元支持10個項目,範疇包括未來技能發展、提升市民生活質素,同埋可持續發展、應對氣候變化方案等,可以惠及全港超過72萬個市民,即係等於每10個人就有一個受惠。