積金局黃友嘉個人強積金投資回報達50% 秘訣係...

2021年02月22日 16:57
東網電視
更多新聞短片
積金局主席黃友嘉在任6年,即將退下火線。
積金局主席黃友嘉(David)在任6年,即將退下火線,卸任前繼續大讚強積金制度可靠性甚高、又有自主性,穩健程度非常適合香港人,更罕有透露自己嘅強積金投資回報佔整體餘額有成50%,唔怪得自己都話好滿意啦。
雖則強積金制度已經20年,但佢話要去到完全成熟,至少需要35至40年時間,最緊要係達到初心,為打工仔提供退休保障。根據積金局嘅數據,咁多年來淨投資回報達36%,而佢嘅回報水平就遠超過呢粒數喇。佢亦話強積金嘅特色係固定供款,可以長時間唔使大動作改變投資配置,叫打工仔實在唔需要花太多時間管理強積金。
問到佢有咩投資準則同埋點樣配置,佢就好謙虛咁話冇一種投資標準適合晒所有人,最緊要睇長期價值,對於自己嘅投資配置嘅秘訣,佢就比較口密喇。
David過去一般都好少講咁多個人野,佢透露,當年後生喺美國做嘅第一筆投資就係可扣稅自願性供款嘅互惠基金,當時自己未夠30歲,而家回望過去,覺得係好make sense嘅抉擇,又唔需要承受股票市場嘅高風險,強調強積金制度唔係益咗基金佬。
至於任內最自豪嘅工作,佢就好謙虛話每一樣都係成個團隊一齊砌出嚟,特別點名有「懶人基金」之稱嘅預設投資策略(DIS),可以幫到冇時間打理強積金嘅打工仔,又設收費上限,同時又有透明度,而佢自己都有再做自願性供款添。