致富智庫:慎言戒口免丟飯碗

2021年04月08日 00:10
東網電視
更多新聞短片
常言道:「言多必失。」若想喺致富及職場路順暢,首先必須「戒口」,否則得罪別人都唔察覺。再者,心想的與口講的多數一致,成功人士永遠知行合一,把口點樣確實重要!
【成功企業家唔講呢7句】
每一位企業家,佢哋成功背後走過嘅路雖然各有不同,但總有共通處,就係離唔開辛勤努力、奉獻時間與熱誠堅持,呢幾樣要學同跟住做唔難。但仲有一樣,成功者與平庸者最唔同,就係心態。
心態呢樣嘢雖然好抽象,但要捉摸亦有方法。以下呢7句,一定唔會出自成功人士把口。快Check吓自己有冇呢啲口頭禪,立即戒咗佢!
1、「呢樣唔係我負責㗎喎」:真係有成功基因嘅人,係唔吝嗇助人成功嘅,連股神巴菲特都講過「後人今日可以乘涼,多得前人種樹」。一個企業家嘅成功,背後其實係團隊合作;想有成就,做人就唔好咁計較。
2、「平時唔係咁做㗎喎」:咁講,代表你唔夠創新力。成功人士對新方法、新事物永無托手踭,仲好享受添!蘋果公司已故教主喬布斯(圖)都曾經講過,「創新力係劃分領導者與跟隨者嘅關鍵」。
就算你真係唔多信某個新意念,亦都唔應該即刻說不,不妨首先問吓提出嘅人呢個意念點做到,又或者不妨同對方討論吓條新橋嘅優點與缺點,總之就唔可以一遇上唔見慣嘅嘢就閂門。
3、「唔公平囉」:喺凡人呻緊呢個世界唔公平時,有成功基因嘅人已經睇透,成就係要靠自己努力爭取,唔係呻呻吓就會天跌落嚟。喺度怨唔公平,不如再努力啲去證明自己,一次唔得就兩次、兩次唔得就3次。
4、「我唔鍾意我份工」:講呢句實情係質疑緊自己嘅選擇,難聽啲講仲侮辱埋自己!所以成功人士係唔會講埋啲阻住自己成功嘅晦氣說話。有時間呻,不如諗吓有咩方法解決。
5、「我冇得揀」:呢個世界充滿機遇同選擇,「冇得揀」只係藉口,與其喺度自憐、自己代入做弱者角色,不如主動去製造機會。
6、「早知我就……」:有早知無乞兒。「早知……」呢個句型咪再講!成功人士係唔會畀自己後悔嘅。佢哋會用實際行動去扭轉局面,再唔係就下次再嚟過,而唔係喺度後悔。
7、「冇可能」:成功者嘅字典入面唔會有「冇可能」呢3個字。所有嘅「冇可能」係自己諗出嚟嘅界限同障礙,應該發揮小宇宙解決同超越。所以「唔能夠」、「唔會」、「冇可能」呢幾句統統要戒!
【打工仔24大禁忌】
受疫情困擾,香港失業率狂飆,而且恐未見頂!咁嘅時勢,要保住飯碗,唔單止要額外拚搏,仲要小心自己把口,皆因「慎言」係打工仔生存之道嘛!對住老闆或者上司,千祈唔好講以下「呢24句」:
1、「我做唔到」:等於同上司講,自己無信心兼唔願試。
2、「做開係咁」:咁即係你懶或者唔識變通,唔肯試其他方法。
3、「我同佢合作唔到呀」:同「我唔受佢玩呀」無分別囉,咁嘅時勢,仲「小學雞」咩!
4、「唔知喎」:應該立即承諾搵出答案,而唔係答句「唔知」,然後齋企喺度。咁嘅時勢,大把人「會知」。
5、「我盡量試吓啦」:調轉你問老闆月尾出糧,佢答「我盡量試吓啦」吖嗱。
6、「唔係我工作範圍喎」:等於同人講,以後除咗「大信封」之外,乜都唔使預你。
7、「唔得」:呢兩個字並非唔講得,只要記住跟手即刻解釋點解唔得,或提出反建議。
8、「我啱啱失戀,做唔到嘢」:咁你應該返屋企搵阿媽呵番,返工根本唔啱你。
9、「你錯」:其實可以對老闆咁講「唔知會唔會係我誤會咗,不過我聽落去好似……」學吓婉轉啲,但無損坦白。
10、「我估……」:斷估,即是畀人知自己冇料、冇做功課。
11、「點解佢有我冇?」:你想要嘅嘢,就直接去爭取,唔好呻,亦唔好拉埋其他人嚟講。
12、「你上手都唔係咁做」:大忌啦!記住依家邊個係你上司先?
13、「我以為……吖嘛」:做錯嘢仲咁多辯駁,爽快認錯好過。
14、「對我有咩好處先?」:咩都計較,咁驚蝕底,擺明冇團隊精神,等住畀人踢出局吧!
15、「Sorry囉,不過……」:仲解釋,即係冇悔意。Sorry之後嗰句只可以係「我以後會多加留意」。
16、「我已經盡咗力喇」:被問責時咁答,擺明係逃避責任。
17、「我好忙,等等得唔得?」:老闆追得,就梗係佢認為趕,你應該問聲係咪有啲工作優先次序改變咗,而唔係叫老闆等你。
18、「佢好乞人憎」:中傷人,你估老闆會點睇你?
19、「我上一間公司都唔係咁做嘅」:咁你不如返番去做吧啦。
20、「唔關我事呀,係佢咋」:卸膊,係死罪。
21、「我想直接同你上司(或人事部)傾」:越級挑戰冇好結果。至於想搵人事部傾,直接去就得,事先張揚等同威脅。
22、「呢啲嘢冇可能做到」:畀着你做上司,下屬乜都話「冇可能做到」,積埋積埋,你話呢?
23、「好悶」:搵第二個呻,總之唔係向老闆呻悶。
24、「咁嘅話我會辭職」:咁即係玩威脅啦,你老闆實成全你。
【銷售員谷數神技】
講到靠把口,銷售員(Sales)一定要有!商業軟件開發商Wrike早前研究出「做Sales 10大谷數神技」,要學曉,唔使一分鐘!
1、反應迅速:邊個覆得快,邊個就搶到客。數據顯示,第一個回應個客嘅Sales或供應商,可以擸到35至50%生意。
2、出手要快:對潛在客戶同任何銷售機會,喺一個鐘內帶頭出手嘅Sales,成功機會比等一、兩個鐘後先行動嘅高7倍,比24個鐘後先識郁嘅高60倍!
3、要夠堅持:數據顯示,平均打8次推銷電話,就會有一次成功拉到客。所以,要堅持。
4、勿言放棄:又係數據顯示,八成做得成嘅生意,至少要打5次電話跟進先得。可惜有44% Sales打咗一次就放棄,應該冇你份啩。
5、攻勢打孖:最好打完電話再發電郵,夠誠意。
6、叫客推介:調查顯示,91%顧客其實願意推介,不過只有11%嘅Sales真係會咁問。問咗就多個客,記住問。
7、人多好辦:美國每8個打工仔,就有一個係Sales。Sales唔怕多,最緊要拉到客。
8、忌慳資源:每年用喺Sales身上嘅資源有10億美元,即係78億港元,想條數靚?呢啲錢唔慳得。
9、計劃清晰:有清晰銷售行動指引嘅公司,佢哋銷售團隊清楚銷售計劃及自己崗位,業績比冇指引嘅公司好33%。
10、做好管理:唔好以為齋顧住跑數就得,要令團隊進步就要做好管理,96%世界級推銷團隊都係咁做,只有43%普通級推銷團隊會咁做,難怪跑極數都只係普通級。