滙豐施穎茵又做義工　派飯之餘仲有新搞作

滙豐香港區行政總裁施穎茵(Diana)每年都會拉隊去做義工。上年Diana就去過深水埗探訪啲基層家庭，見到不少小朋友缺乏在家學習嘅工具，所以就諗咗條橋，將滙豐嘅一啲平板電腦回收，送俾莘莘學子。所以，近排Diana就搵埋滙豐香港區營運總監林慧虹(Luanne)一齊去惜食堂，派飯之餘仲派電腦！

年頭嘅時候，滙豐內部就收集咗300部平板電腦，同國際十字路會合作，幫電腦「洗白白」，做好晒消毒，裝返啲基本嘅App入去，再送俾啲有需要嘅家庭，幫助小朋友愉快學習，仲可以減少浪費添。

幫完小朋友，當然唔會唔記得班老友記啦！Diana 、Luanne，仲同惜食堂創辦人董愛麗一齊，幫手準備飯盒俾區內嘅長者，除咗「例牌」嘅兩餸飯之外，仲額外準備咗傳統糕點，有芝麻卷、砵仔糕等等，等啲長者食飽之餘，仲可以「甜入心」！