政府另類派錢別執輸!iBond過往分發情況如何?點抽至醒?

20210602
東網電視
更多新聞短片
 
香港第8批最多200億元通脹掛鈎債券(iBond)正接受認購,基本上是零風險穩賺2厘息,雖然唔係多,但放在銀行一樣冇咩收入回報,若然抽中幾手,快賺一千幾百又唔係咩壞事,反正政府變相派錢,多少無拘,何樂而不為?
iBond最低面額是1萬港元,年期3年,投資者可以持有至到期,亦可經二手市場沽售,或以場外方式向銀行出售。回顧對上一次在2020年推出的第7批iBond(04239)(見附表),當時獲45.6萬人認購,約23萬人獲分配上限4手,另有約22.5萬人獲發3手或以下,上市以來價格最高見過104.95元;而若以周二(1日)收報102.9元,成功認購者甫上市即沽茶錢固然早已「袋袋平安」,若持有至今每手帳面賺290元,都好過放銀行活期存款利息。
由於iBond的分配機制,是「循環分派」,即會先確保人人有一定份額,再將剩餘的手數以循環方式分發予認購一定手數或以上的人士,直至手數不足以再進行下一個循環,再按抽籤形成分發餘下手數。故最好的方法,是動用家中所有合資格成員參與認購,不用孖展認購,每人認購3至5手,確保以最低成本每人認購到1手或以上就好。例如一家四口,每人抽中2至3手的話,估計成家合共或可賺逾兩千蚊,食番餐或者幫補吓家用都唔錯。
當然,有股民話,一家4口每人入4手,都十幾萬元,會唔會去揀隻個股炒吓搵錢搵得多啲快啲。理論上如果喺點石可以成金的大旺市,當然成理;但如今市況上上落落,要搵隻穩陣的個股唔係咁容易,炒股冇「包生仔」,可以贏亦可以輸。反觀iBond政府基本上保底唔會蝕,坐收兩厘息,個人認購若穩中2至3手冇咩風險可以執隻「啡牛」,6月11日截止認購,6月23日有暗盤交易,6月24日上市,頭尾不到兩周時間,別單純看絕對回報,站在資金風險與回報的角度看,還是值得按按手機認購...
東網產經專欄作者 帥哥