半年結加維穩月將至 港股可趁調整收集?呢個板塊值博?

20210622
東網電視
更多新聞短片
上周筆者都提過,香港樓市轉旺,依照最新的二手樓成交推斷,如無意外唔使1個月,二手樓價指數有望創出歷史新高。香港業主身家水漲船高,照計消費意欲都大啲,再加上暑假政府將發放電子消費券,相信第3季本地經濟氣氛會有改善,主要風險因素係放寬入境檢疫要求下,防疫成效會否再受到考驗。
講起樓市,新盤同二手樓都轉旺,咁地產股值唔值得押注?老實講,若然第3季本地經濟氣氛改善,照計商業租務都會有改善條件,加上住宅樓市又咁旺,都唔係冇得諗。再講,嚟緊7月照計香港會以最佳狀態示人,以向外證明,香港一切安好,哪怕甚麼移民潮、外資走資潮,地產價格硬淨就是一個最好的經濟指標。由於地產股係港股重磅板塊,所以如果大家睇好未來一個月港股表現,可以關注本地藍籌地產股,咁啱呢類股份最新股價普遍已作調整,加上周內認購iBond的可觀資金將會解凍,或者會重投市場搵嘢買,故不妨望多兩眼。
此外,最新美國聯儲局放鷹,引發市場調整。但其實今年內,美息都唔會郁,講緊的都係明年的事,筆者總覺諗掂明天及下月已經好叻,何況係明年的事?更何況眼前美國經濟復甦步伐未穩,若然因聯儲局政策大變而引發美股大冧,豈非要將萬億美元刺激經濟的成效抵銷?本周多位聯儲局官員放話,相信過埋呢個波動周,下周股市方向會明朗化,基金半年結粉飾窗櫥效應仍有機會發揮一定作用。
不過,戴頭盔都咁話,未來1個月中、港題材愈係要維穩,外圍地緣政治局勢可能會愈多變數。所以短期參與股市,還是要量力而為,嚴控注碼;若然唔想食驚風散,輕倉自然係最好的對策。
東網產經專欄作者 帥哥