無事生事?滙豐前言不對後語 到底搞邊科?

20210623
東網電視
更多新聞短片
近年唔少香港人移民,但去到外國,稅率貴,投資機會也不比香港多,且人生路不熟,故不少香港人雖然人離港了,但條件許可會傾向留下香港的物業收租,又或繼續透過互聯網買賣港股,積極遙距理財搵食。
誰知,周二(22日)收市後,突然傳來話滙豐控股(00005)旗下滙豐銀行將於7月26日起推出網上及流動理財條款修訂版本,當中提及網上及流動理財只供該公司於香港的客戶在香港使用,隨即惹來港人身處海外,將不能使用網上理財服務的猜測。更有已移民的股友立即發訊息來問,是否港府要趕絕出走的香港人,移民了不可再投資香港資產,咁香港仲叫咩「國際金融中心」云云……總之講到一肚氣,又慌慌張張,大失預算咁!
不過,後來滙豐發言人澄清,香港客戶可如常於海外使用網上及流動理財服務,沒有更改相關服務的計劃,是次條款更新,是將目前的「滙豐網上理財條款及細則」及「香港滙豐流動理財應用程式及流動保安編碼條款及細則」合併為單一文本,方便客戶能一併查閱。滙豐在其他營運地點亦有類似條款,並就此事為客戶帶來不便致歉。班身在海外而仍有唔少身家喺香港的「有銀士」,立刻定番啲!
不過,事實係,該條款修訂列明,若客戶在香港以外地方使用或下載網上或流動理財,該公司未必獲准在客戶所在或居住的國家/地區向客戶提供相關產品或服務。即係話,移民海外的香港人,呢一刻喺海外仲用到香港網銀服務,但將來有咩變化,又唔好話服務商冇事先聲明了。
到底係虛驚一場,都係來一次走火警?筆者都搞不清楚。但咁大間銀行,處理咁敏感的訊息,又冇道理咁擺烏龍法。其實呢次事件亦帶出一個問題,在中美爭霸下,全球經濟若真朝半球化發展,使用類似國際金融服務遇到障礙的情況,並非天方夜譚。所以,可以的話,身家放喺自己所在地,有當地法律保障,理論上可免不必要風險。香港人移民了,其實香港資產就視為個人的海外投資,海外投資幾時都要注意當地的法律條款,最好仲係分散風險,即唔好太過側重喺單一個市場,將雞蛋放晒同一個籃。始終身處全球政經動盪的大時代,一夜變天的例子愈來愈多,都係知足常樂……
東網產經專欄作者 帥哥