「七翻身」將至　港股等緊乜？有咩冧巴可留意？

眨眼今日已是6月25日，仲有幾日就係7月1日香港回歸紀念日，亦係內地的大慶日，按理即使個市唔升，都唔應該會大跌咁掃興。咁到底港股會唔會真係喺「五窮」同「六絕」之後，來個「七翻身」呢？

筆者認為，觀次季港股大部分時間以整固為主，6月基金半年結後，7月有突破的可能性存在，但向上定向下？從企業盈利和指數技術走勢向，暫看向上闖關的可能性比破底機會大。若然恒指真的要上試29,000至30,000點水平，7月上中旬的機會較大，畢竟中國人大日子都愛喜慶，若然真係有呢一浪，個市靜咗咁耐，能否一舉試破今年以來的高位31,183點，關鍵還看科技股的氣氛是否配合。

板塊方面，建議留意在內地市場發展順利的友邦保險(01299)、受惠香港經濟復甦及暑假本地消費旺季的港鐵公司(00066)和領展房產基金(00823)。此外，幾家大型內銀股派息即將除淨，可留意小注博財息兼收的機會，關注招商銀行(03968)及交通銀行(03328)。

東網產經專欄作者　帥哥